प्रदेश सरकारसे ६ गते शोक विदा
पहुरा समाचारदाता
धनगढी, ५ असार । आन्तरिक मामिला तथा कानुन मन्त्रालय सुदूरपश्चिम सरकारसे बुधके रोज (असार ६ गते) विदा डेना जनैले बा ।
सुदूरपश्चिम प्रदेश सरकार, आन्तरिक मामिला तथा कानुन मन्त्रालयके माननीय मन्त्री पृथ्वी बहादुर सिंह सरकारी कामके सिलसिलामे आज डडेल्धुरा जिल्लासे बझाङ जिल्ला जैना क्रममे बझाङ जिल्लाके केदारस्यूँ गाउँपालिका वडा नं. १ जुवालीखेत, देउरामे दुर्घटनामे असामयिक निधनमे २०८० साल असार ६ गते बुधके दिन सुदूरपश्चिम प्रदेशभर शोक बिदा डेना विज्ञप्तीमे जनैले बा ।
माननीय मन्त्रीसहित ५ जाने सवार सु. प.प्र. ००१ झ. ४८० नम्बरके गाडी दुर्घटनामे परके उहाँके धर्मपत्नी अमृतादेवी सिंह ओ भाउजी जयादेवी सिंहके प्राथमिक उपचारके क्रममे देउरास्थित रितु पोलिटेक्निकमे निधन हुइल ओ माननीय मन्त्रीहे उपचारके लाग नेपाली सेनाके हेलिकप्टरसे नेपालगञ्ज मेडिकल कलेज पुगाइलमे उपचारके क्रममे साँझके ५ बजके ३३ मिनेटमे देहावसान हुइल रहे । सुदूरपश्चिम प्रदेश सरकार (मन्त्रिपरिषद्) के मंगरके बैठल बैठकसे सवारी दुर्घटनामे परके निधन हुइल मृतकप्रति हार्दिक श्रद्धाञ्जली एवं शोक सन्तप्त परिवारजनमा हार्दिक समवेदना प्रकट कैना साथे घाहिलहुकनके शीघ्र स्वास्थ्य लाभके कामना करल बा ।
असार ६ गते बुधके दिन सुदूरपश्चिम प्रदेशभर शोक बिदा डेना ओ उ दिन सुदूरपश्चिम प्रदेशभरके सरकारी तथा सार्वजनिक निकायमे नेपालके राष्ट्रिय झण्डा आधा झुकैना निर्णय करल सम्बन्धित सक्कुहुनके जानकारीके लाग विज्ञप्तिमार्फत जानकारी डेहल बा ।
मुख्यमन्त्री शाहसे शोक वक्तव्य
सुदूरपश्चिम प्रदेश सरकारके मुख्यमन्त्री कमलबहादुर शाह आन्तरिक मामिला तथा कानुन मन्त्रालयके माननीय मन्त्री पृथ्वी बहादुर सिंहके असामयिक निधन प्रति दुःख व्यक्त करले बटै ।
दुर्घटनापाछे माननीय मन्त्रीके उपचारके क्रममे नेपालगञ्ज मेडिकल कलेजमे हुइल निधनप्रति भावपूर्ण श्रद्धाञ्जली अर्पण करटी उहाँहुकनके आत्माके चिर शान्तिके कामना सहित यस दुःखद घडीमे शोक सन्तप्त परिवारजनमे हार्दिक समवेदना व्यक्त करटु विज्ञप्तीमे कहल बा । उ दुर्घटनाक घाहिलहुकनके शिघ्र स्वास्थ्य लाभफे कामनाफे उहाँ करले बटै ।
नेपालके लोकतान्त्रिक आन्दोलन ओ नेपाली कांग्रेस पार्टीमे उहाँसे पुगाइल योगदान सदा स्मरणीय रहनाके साथे उहाँके सरल स्वभाव ओ सादगी जीवनशैली हमार सक्कुहुनके प्रेरणाके स्रोत हुइना विश्वास लेहल मुख्यमन्त्री शाह कहले बटै ।
