भौतिक पूर्वाधार योजनाके अनुगमन
पहुरा समाचारदाता
हसुलिया, १२ असार । कैलारी गाउँपालिकास्तरीय अनुगमन समितिसे मंगरके रोज भौतिक पूर्वाधार योजनाके अनुगमन करले बा ।
अनुगमन समिति संयोजक तथा गाउँपालिका उपाध्यक्ष भगवतीकुमारी चौधरीके नेतृत्वमे स्थलगत अनुगमन कैगिल हो । अनुगमन समितिसे कैलारी–६ स्थित सरस्वती मावि भवनके अनुगमन कैगिल बा । २० लाख बजेटमे निर्माण हुइटी रहल यी योजनाके काम सम्पन्न हुइल बा ।
वडा नम्बर ८ मे रहल लक्ष्मी माविके भवन ओ गेटके अनुगमन कैगिल बा । ४५ लाख निर्माण हुइटी रहल भवनके काम लेन्टरसम हुइल बा कलेसे पाँच लाख बजेटमे निर्माण हुइल गेटके काम निम्जल बा ।
वडा नम्बर २ मे रहल राष्ट्रिय मावि विचैपुरके भवनके अनुगमन कैगिल बा । भवन निर्माणके लाग २० लाख बजेट विनियोजन हुइल रहे । वडा नम्बर बसौटी स्वास्थ्य चौकीके भवनके अनुगमन कैगिल बा । यहाँ पिल्लर ढलान हुके चिनाईके काम हुइटी रहल बा । वडा नम्बर ९ मे रहल रौरा बाबा विद्युत सहकारीके भवनके काम लेन्टरसम हुइल बा । २० लाख बजेटमे निर्माण हुइटी भवनहे समयमे सेक्ना निर्देशन देहल बा ।
ओस्टेक करके वडा नम्बर ८ मे प्रधानमन्त्री रोजगार योजनाके अनुगमन कैगिल बा । अनुगमन टोलीमे समिति संयोजक भगवतीकुमारी चौधरी, पूर्वाधार विकास समिति संयोजक प्रेमबहादुर चौधरी, समिति सदस्य सुनिला चौधरी, योजना शाखाके प्रमुख सन्तोषकुमार चौधरी, प्रधानमन्त्री रोजगार सहायक इन्द्रश्याम चौधरी, असई रविशंकर चौधरीलगायत सहभागिता रहे ।
