कैलारीके सुन्धारा महिला सामुदायिक वनमे वृक्षारोपण

पहुरा समाचारदाता
धनगढी, १४ असार । कैलालीके कैलारी गाउँपालिका–३ स्थित मोहनपुरमे रहल सुन्धारा महिला सामुदायिक वनमे वृक्षारोपण कैगिल बा । सुदूरपश्चिम प्रदेशके उद्योग, पर्यटन, वन तथा वातावरण मन्त्री रमेश धामी वृक्षारोपण कार्यके उदघाटन करल रहिट । उ अवसरमे मन्त्री धामी वृक्षारोपणसे सामुदायिक वन संरक्षणमे टेवा पुग्न बटैलै ।

दुधुवा नेशनल पार्कसंग जोरल ओरसे जैविक कोरिडोरके लाग सुन्धारा महिला सामुदायिक वन महत्वपूर्ण रहल ओरसे यकर संरक्षणमे ध्यान डेना मन्त्री धामी आग्रह करलै । प्रदेश सरकारसे कौनोफे वहानामे बनुवा मासे नइडेना बटैलै । ‘जंगली जनावरसे हुइना क्षति रोक्टी वन संरक्षण करे परठ । प्रदेश सरकारसे कौनोफे वहानामे बनुवा मासे नइडेजाई,’ उहाँ कहलै, ‘नागरिकसे वनसे हुइना लाभ लेहे परठ ओ वन संरक्षणफे करे परठ ।’

कैलाली गाउँपालिकाके अध्यक्ष राजसमझ चौधरी बृक्षरोपणसे लडिया कटान रोक्नामे सहयोग पुग्ना बटैलै । उहाँ कहलै, कैलारीमे मोहनापारी तीन गाउँ मोहनपुर, शिवरत्नपुर ओ हौसलपुर बा । यी बस्ती बाढके डुवान, कटान ओ पटानसे उच्च जोखिममे बा । सुन्धारा सामुदायिक वनमे कैगिल बृक्षरोपणसे पाछेक लाग लडिया कटानहे रोके सेक्ना सहयोग करी लगाइल टेलुवामे संरक्षण कैना उपभोक्तासे ध्यान डेहे परल ।

वडा नम्बर ३ शिवरत्नपुरमे बाढके कटानसे १६ घर विस्थापित हुइल ओरसे लडिया कटानहे रोक लाग प्रदेश सरकारसे ध्यान डैदेनाफे उहाँ आग्रह करलै ।

डिभिजन वन कार्यालय धनगढीके प्रमुख केशव पराजुली वृक्षारोपणसे वन संरक्षणसंगे लडिया कटानी ओ पटानी करल जमिन उकास हुइना विश्वास व्यक्त करलै । लडिया उकास क्षेत्रमे वृक्षारोपण करके वन ओ जमिन संरक्षण करे खोजल उहाँ बटैलै ।
‘टेलुवा लगैना मने हुरकैनामे ध्यान नइडेना आरोप वन कार्यालयहे लग्टी आइल बा । हम्रे यहाँ पहिले तारवार करके वृक्षारोपण करटी,’ पराजुली कहलै, ‘यिहीसे लडिया कटान करल जमिन उकाससंगे वातावरण संरक्षणमेफे टेवा पुगी ।’ भारतके दुधुवा नेशनल पार्क ओ बसन्ता जैविक मार्गसंग जोरल सुन्धारा सामुदायिक वन महत्वपूर्ण रहल उहाँ बटैलै ।

उ सामुदायिक वनके अध्यक्ष सीता चौधरी गैल वर्षफे वृक्षारोपण करल मने जोगाइ नइसेकल बटैली । तारवार करल ओरसे यी वर्ष टेलुवा जोग्ना उहाँ विश्वास व्यक्त करली ।

कार्यक्रममे उद्योग, पर्यटन, वन तथा वातावरण मन्त्रालयके राज्यमन्त्री गीतादेवी माल, संविधान सभा सदस्य बीरमान चौधरी, मन्त्रालयके सचिव वेदकुमार ढकाल, कैलारी गाउँपालिकाके निवर्तमान अध्यक्ष लाजुराम चौधरी, कैलारी गाउँपालिलका वडा नम्बर के अध्यक्ष सन्तराम चौधरी, वडा सदस्य सैतुराम चौधरी, मन्त्रालय ओ वनके कर्मचारीलगायतके सहभागिता रहल रहे । वृक्षारोपण कार्यक्रम सव वन डिभिजन कार्यालय बसन्ताके आयोजनामे हुइल रहे । राष्ट्रिय वृक्षारोपण दिवसके अवसरमे बिफेक उ सामुदायिक वन क्षेत्रमे टमान प्रजातिके करिब दुई सय टेलुवा लगाइल बा ।