लैंगिक अल्पसंख्यकके समस्या समाधानके लाग प्रदेश तयार बा ः मन्त्री साउद

पहुरा समाचारदाता
धनगढी, १५ असार । सुदूरपश्चिम प्रदेशके सामाजिक विकास मन्त्री झपट बहादुर साउँद यौन लैगिङक अल्पसंख्यक समुदायके समस्याहे प्रदेश सरकारसे नीति तथा कार्यक्रममे समेटल बटैले बटै ।

निल हिरा समाज ओ सुदूरपश्चिम समाजसे विफेक रोज धनगढीमे आयोजना करल स्थानीय सरकारसँग नीतिगत संवाद कार्यक्रममे मन्त्री साउद यौनिक लैगिक अल्पसंख्यक समुदायके समस्याहे नीति तथा कार्यक्रममे समेटके बजेट समेत विनियोजन करल बटैलै ।

यी समुदायके व्यक्तीहुकनहे समाजमे हुइना मतभेद लगायत समाजसे हेर्ना दृष्टिकोण फरक रहल ओरसे यिहीहे चिर्न आवश्यक रहल उहाँ बटैलै । संविधानमे हक अधिकार सुनिश्चितता करल मने ओकर पूर्ण पालना हुई नइसेक्के अभिनफे यैसिन समुदायके व्यक्ति पाछे परल मन्त्री साउदके कहाई बा ।

लैंगिक अल्पसंख्यकके समस्या समाधानके लाग प्रदेश सरकार समन्वय ओ सहकार्य कैना तयार रहल मन्त्री साउद बटैलै । कार्यक्रममे सहभागी सरोकारवालाहुक्रे यौनिक लैगिक अल्पसंख्यक व्यक्तीहुकनहे सामाजिक सुरक्षा डेना आवश्यक रहल बटैलै । सरकारसे बनैना नीति तथा कार्यक्रममेफे पहुँचके आधारमे हुइल ओरसे अल्पसंख्यक समुदाय पाछे पर ओइनके तर्क बा ।
नीति तथा कार्यक्रममे लैगिक अल्पसंख्यक समुदायहे समेटल ओ बजेट समेत विनियोजन करल सरोकारवालाहुकनके दाबी बा ।
२०७८ के जनगणना अनुसार सुदूरपश्चिममे १९८ जाने यौनिक लैगिक अल्पसंख्यक समुदायके मनै रहल बटै । कार्यक्रम निल हिरा समाजके अध्यक्ष पिकी गुरुङके अध्यक्षतामे हुइल रहे ।