६ महिनाभिटरे काम सेक्ना आयोगहे मन्त्रीके निर्देशन

पहुरा समाचारदाता
धनगढी, १६ असार । भूमि व्यवस्था, सहकारी तथा गरिबी निवारण मन्त्री रन्जिता श्रेष्ठ अइना ६ महिनाभिटर कैलाली जिल्लामे नाप नक्साके काम सेक्ना कैके आघे बह्रना जिल्ला भूमि आयोगहे निर्देशन डेले बटी ।

शनिच्चरके रोज कैलाली जिल्लाके बर्दगोरिया गाउँपालिका वडा नम्बर ३ से भूमिहिन दलित, भुमिहिन सुकुम्बासीहे जग्गाधनी लालपुर्जा वितरण कार्यक्रममे उहाँ ओसिन निर्देशन डेहल हुइट । मन्त्री श्रेष्ठ देशभरके भूमि सम्बन्धी समस्या रहल ओर हाली समाधान कैना ओर अपने लागल बटैली ।

उहाँ कहली, ‘तराईमे कमैया प्रथा उन्मुलन हुइल २३ वर्ष हुइल मने सुनेबेरफे अचम्म लागठ । अब हमार लक्ष्य उ भूमिहिन कमैया, कमलरी ओ दलित परिवारहे जग्गाके लालपुर्जा डेनाफे हो ।’

देशके और भुभागमे रहल सक्कु भूमिहिन नेपाली जनताहे जग्गाके स्वामित्व ओ लालपुर्जा क्रमश उपलब्ध करैटी जैना प्रतिवद्ध व्यक्त करटी संविधानसे डेहल अधिकार अनुसार आब कोईफे नेपाली भूमिहिन हुई नइपर्ना मन्त्री श्रेष्ठ बटैली । भूमिहिनहुकनहे जग्गाके लालपुर्जा डेना राष्ट्रिय भूमि आयोगसे ७७ जिल्लामे काम करटी रहलफे उहाँ बटैली ।

बर्दगोरिया गाउँपालिका वडा नम्बर ३ से भूमिहिन दलित, भुमिहिन सुकुम्बासीहे जग्गाधनी लालपुर्जा वितरण कार्यक्रममे वडा नम्बर ३ के ३ जाने भुमिहिन दलित ओ २ जाने भूमिहिन सुकुम्बासीहे जग्गा धनी लालपुर्जा बितरण कैगिल बा ।
लालपूर्जा वितरण भूमि व्यवस्था, सहकारी तथा गरिबी निवारण मन्त्री रन्जिता श्रेष्ठ, कैलाली भुमी आयोगके अध्यक्ष यज्ञराज उपाध्याय, प्रतिनिधि सभा सदस्य अरुण चौधरी, प्रदेश सभा सदस्य रामेश्वर चौधरी ओ बर्दगोरिया गाउँपालिका अध्यक्ष कर्णबहादुर कुँवर करल रहिट ।

यी आघेक आयोगसे अधुरा राखल काम ओ अब्बे नाप नक्सा तयार हुइलहे क्रमशः पुर्जा वितरण करटी जैना भूमि आयोग कैलालीके अध्यक्ष यज्ञराज उपाध्याय बटैलै ।

विगत नम्मा समयसे भूमिहिन सुकुम्बासीके समस्या रहे उ आज बर्दगोरियाके जनता जग्गा धनी पुर्जा पाके कुछ हदसम समस्या समाधान कैना सुरुवात हुइल बटैलै ।

६ महिना भिटरे कैलाली जिल्लामे नाप नक्साके काम सेक्के सक्कुहुनहे जग्गा धनी पुर्जा उपलब्ध करैना ओर आयोग लागल अध्यक्ष उपाध्याय बटैलै ।

बर्दगोरिय गाउँपालिका अध्यक्ष कर्णबहादुर कुँवर पालिकाके सक्कु जनप्रतिनिधि ओ कर्मचारीके अथक मेहनत ओ परिश्रमसे वडा नम्बर ३ मे लालपुर्जा वितरण कैना सफल हुइल बटैलै ।

उहाँ कहलै पहिल चरणमे हम्रे वडा नम्बर ३ के ५ जाने भूमिहिन दलित ओ भूमिहिन सुकुम्बासीहे लालपुर्जा बितरण करल बटी । अइना ६ महिना नाही हम्रहिनहे काम करे डि हम्रे ३ महिनामे बर्दगोरियाके नाप नक्साके काम सेक्न करके आघे बढ्न पालिका अध्यक्ष कुँवर प्रतिवद्धता समेत व्यक्त करलै ।

अइना दिनमे नाप नक्सा नइहुइल क्षेत्रमे नाप नक्सा कैना ओ नाप नक्सा हुइल भुमिहिन दलित, भुमिहिन सुकुम्बासी ओ अव्यवस्थित बसोबासीहुकनहे जग्गाधनी पुर्जा वितरण कैना जिल्ला भूमी आयोग संग पहल सुरु कैना बटैलै ।

कार्यक्रममे कैलाली क्षेत्र नम्बर २ के प्रतिनिधि सभा सदस्य अरुण चौधरी, सुदुरपश्चिम प्रदेश कैलाली क्षेत्र नम्बर २ प्रदेश सभा ख के प्रदेश सदस्य रामेश्वर चौधरी, नापी विभागके महानिर्देशक जनकराज जोशी, बर्दगोरिया गाउँपालिका उपाध्यक्ष गणेशराज गिरी ओ नागरिक उन्मुक्ति पार्टीके संरक्षक तथा निर्वतमान प्रतिनिधि सभा सदस्य रेशम चौधरी लगाएतसे नम्मा समयसम भोक करटी आइल भुमिहिन दलित, कमैया ओ भूमिहिन सुकुम्बासीहे तत्काल जग्गा धनी लालपुर्जा उपलब्ध करैनाच तीन तहके सरकारसे काम सुरु करे पर्ना माग करले बटै । कार्यक्रमके संचालन स्थानीय सरकारके प्रवक्ता मिथुन गौतम करले रहिट ।

बाँकेके नगरैनापुरमे ७७ घर परिवारहे लालपुर्जा वितरण

भुमि व्यवस्था, सहकारी तथा गरिवि निवारण मन्त्री रन्जीता श्रेष्ठ चौधरी बाँकेके नगरैनापुर गाउँपालिकाके गाउँब्लकमे रहल भुमिहिनहुकन जग्गा धनि प्रमाण पुर्जा वितरण करले बटी । नरैनापुर गाउँपालिका वडा न ४ मे गाउँब्लकमे रहल ७७ घर परिवारहुकन शुकके जग्गाधनी प्रमाण पुर्जा वितरण कैगिल नापी कार्यालय बाँकेके नापी अधिकृत मिरा न्यौपाने जनकारी डेले बाटी । जग्गा धनि प्रमाण पुर्जा वितरण कर्टी मन्त्री रन्जीता नरैनापुरमे रहल गाउँब्लकके थप ४ सय नागरिकहुकन कुछ महिना भिटरे जग्गा वितरण करसेक्ना बटैली । मन्त्री रन्जीता नापी होसेक्लक गाउँ ब्लकके जग्गा धनी प्रमाण पूर्जा वितरण अभियान शुरु कैगिल ओ यी अभियानमे भूमि होकेफे भूमिविहिन बन्टी रहल कोईफे नइछोटे पर्नामे जोर डेटी नापी हुईना बाँकी गाउँब्लकके नापी करेक लागफे प्रक्रिया आघे बह्रासेकल जनकारी करैले रही ।

उहाँ नरैनापुरमे नापी ओ मालपोत कार्यालय धर्ना निर्णय होसेकल बटैटी सावन महिन भिटरे कार्यालय सञ्चालमे अईना बटैली । मन्त्री रन्जीता नरैनापुरमे ईलाका प्रशासन कार्यालय अविलम्व संचालनके लाग मन्त्री परिषदके बैठकमे प्रस्तावके रुपमे पेश कर्ना प्रतिवद्धता करली । मन्त्री रन्जीता भुमिहिन दलित, सुकुम्बासी ओ अव्यवस्थित बासोबासीके समस्या समाधान कैना मेरके काम हुईटी रहल बटैटी मुक्त हलिया, कमलहरी, कमैयाहुकन समस्या समाधान करेक लााग अपने लागि परल बटैले बटी ।

आव कोईफे नेपाली नागरिक भूमि अधिकारसे बञ्चित हुइ नइपरी कहटी आपन कार्यकाल भिटरे भूमिहिनके समस्या समाधान कर्ना मेरके काम कर्टी रहल जानकारी डेली । कार्यक्रममे नरैनापुर गाउँपालिकाके अध्यक्ष ईस्तियाक अहमद शाह नरैनापुरमे मन्त्री रन्जिताहे स्वागत कर्नाके संगे नरैनापुरमे ईलाका प्रशासन, नापी, मालपोत ओ भन्सार कार्यालय संचालनके लाग पहल कैडेना अर्जि करल रहिट । उहाँ नरैनापुरके विकासके लाग समेत ध्यान डेना मन्त्रीके ध्यानाकर्षण करैले रहिट ।