लागूऔषध दुर्व्यसन बह्रटी
पहुरा समाचारदाता
धनगढी, १८ असार । सुदूरपश्चिम प्रदेशमे दिनप्रति दिन लागूऔषध दुर्व्यसन बह्रटी गैल बटाइल बा ।
सोम्मारके रोज सुदूरपश्चिम प्रदेश सरकार आन्तरिक मामिला तथा कानून मन्त्रालय धनगढीके आयोजनामे हुइल लागू औषध दुरुपयोग तथा अवैध ओसारप्रसार नियन्त्रण सम्बन्धी सरोकारवालाहुक्रनसे करल छलफल कार्यक्रममे प्रस्तुत तथ्यांक अनुसार बह्रल डेखाइल हो ।
सुदूरपश्चिम प्रदेश प्रहरी कार्यालय धनगढीके प्रहरी उपरिक्षक श्यामसिंह चौधरीसे प्रदेशमे लागु औषधके अवस्था बारे त्रिवर्षीय तथ्यांक प्रस्तुत करल रहिट । उहाँसे प्रस्तुत करल तथ्यांकमे प्रदेशमे लागूऔषध दुर्व्यसन बह्रटी गैल डेखाइल बा । उहाँसे प्रस्तुत प्रदेशमे लागू औषध दुर्व्यसन मुद्दाके त्रिवर्षीय अपराध तथ्यांक अनुसार आव २०७६÷०७७ मे १७१, २०७७/०७८ मे २५३ ओ २०७८/०७९ मे ३५३ रहल बा ।
ओस्टके प्रदेशभर लागू औषध मुद्दाके प्रतिवादीहुक्रके त्रिवर्षिय तथ्यांक अनुसार २०७६/०७७ मे २७०, २०७७/०७८ मे ३९४ ओ २०७८/०७९ मे ५६३ ओ चालु आवमे ६७० रहल बा । कलेसे लागूऔषधमे संलग्न महिला प्रतिवादीहुक्रनके त्रिवर्षीय तथ्यांक अनुसार २०७६/०७७ मे १३, २०७७/०७८ मे १८ ओ २०७८/०७९ मे २१ ओ चालु आव २०७९/०८० मे ५३ रहल बा ।
ओस्टके प्रदेश प्रहरी मातहत कार्यालयके हिरासतमे रहल २६७ थुनुवा मध्ये १३७ लागु औषधके ओ १३० जाने अन्य कारणसे हिरासमतमे रहल जनाइल बा ।
प्रहरी उपरिक्षक चौधरी लागू औषध ओम्ने फेन खैरो हिरोइन प्रदेशके लाग चुनौती रहल बटैलै । उहाँ ओकर नियन्त्रणके लाग सक्कु सरोकारवाला निकायहे आआपन ओरसे सेक्ना सहयोगके लाग आग्रह फेन करल रहिट ।
उहाँ कहलै– ‘प्रहरीके एकल प्रयाससे लागु औषध नियन्त्रण कैना चुनौती रहल बा, यकर लाग सक्कु सरोकारवाला निकाय आआपन ठाउँसे लागे पर्ना आवश्यक रहल बा ।’
कार्यक्रममे कञ्चनपुरके प्रमुख जिल्ला अधिकारी गोपाल कुमार अधिकारी खुल्ला सिमानाके कारण लागूऔषध नियन्त्रण कैना समस्या रहल बटाइल रहिट । टौन फेन उहाँ प्रहरी प्रशासन लागू औषध नियन्त्रणके लाग कटिबद्ध होके लागल बटैलै ।
सदूरपश्चिमके प्रदेशके मुख्य सचिव नारायण प्रसाद शर्मा दुवाडी लागू औषध नियन्त्रणके लाग तिनु सरकार, सरोकारवाला निकाय सक्कु जाने एकजुट होके लागे पर्ना बटाइल रहिट ।
ओस्टके कार्यक्रमके बर्का पहुना तथा मुख्यमन्त्री कमल बहादुर शाह लागुऔषध नियन्त्रणके लाग प्रदेश सरकार नीति तथा कार्यक्रम बनाके आघे बह्रल बटैलै । उहाँ लागू औषध नियन्त्रणके लाग अभियानके रुपमे लागे पर्ना फेन सक्कु निकायहे आग्रह करल रहिट ।
कार्यक्रम आन्तरिक मामिला तथा कानून मन्त्रालयके निमित्त सचिव विश्वदिप बेस्राके अध्यक्षतामे हुइल रहे । कार्यक्रममे टमान सरकारी तथा गैरसरकारी संघसंस्थानके प्रतिनीधीहुक्रनके सहभागिता रहल रहे ।
