प्रेस यूनियन कैलालीके छैठौं जिल्ला अधिवेशन सुरु
पहुरा समाचारदाता
धनगढी, १९ असार । नेपाल प्रेस यूनियन कैलाली शाखाके छैठौंै जिल्ला अधिवेशन सोम्मारके रोजसे धनगढीमे सुरु हुइल बा ।
छैठौं अधिववेशनके उद्घाटन परराष्ट्रमन्त्री एनपी साउँद करले रहिट । उद्घाटन कार्यक्रममे बोल्टी उहाँ विकासके नाउँमे छोट बजेट (खुदी छिटना) डेना हुइल बटैले बटै । नेपालमे विगतसे गलत प्रवृति हाबी हुइल बा, उहाँ कहलै, पहँुचके भरमे बजेट डेजाइठ । मने हम्रे सक्कु दलके सहमतिमे पराराष्ट्र आघे बह्रैना काम करटी बटी ।
परराष्ट्रमन्त्री साउद यूनियनके अधिवेशनके सफलताके शुभकामना व्यक्त करटी सहमति प्रणालीसे लौवा नेतृत्व छनौट कैना आग्रह करलै ।
कार्यक्रममे नेपाली काँग्रेस केन्द्रीय सदस्य नृप बहादुर ओड, नेपाल प्रेस यूनियनके केन्द्रीय प्रतिनिधि दामोदार दवाडी, नेपाली काँग्रेस कैलालीके सभापति नारायणदत्त भटट्, नेपाल पत्रकार महासंघ प्रदेश अध्यक्ष योगेश रावल, नेपाल प्रेस यूनियन सुदूरपश्चिम प्रदेश अध्यक्ष मनमोहन स्वाँर लगायतसे शुभकामना मन्तव्य व्यक्त करल रहिट । यिहे विच नेपाल प्रेस यूनियन कैलालीके पूर्व अध्यक्ष डा.टिएन जोशी, जगत साउद, टेकराज जोशीहे सम्मान कैगिल बा ।
यूनियनके जिल्ला अध्यक्ष श्रवण देउवाके अध्यक्षतामे हुइल कार्यक्रममे उपाध्यक्ष भावना जोशी स्वागत मन्तव्य व्यक्त करल रहिट । संचालन सचिव सितााराम ओझा करल रहिट । ओस्टेक करके अधिवेशनके बन्द शत्रमे सचिव सिताराम ओझा बार्षिक ओ कोषाध्यक्ष सुनिल आउजी आर्थिक प्रतिवेदन प्रस्तुत करल रहिट ।
अध्यक्ष पदके लाग भावना जोशी ओ सिताराम ओझाके दाबी रहल बा । भावना वर्तमान उपाध्यक्ष हुइट कलेसे सिताराम अब्बेक सचिव हुइट । नेपाल प्रेस यूनियन कैलाली शाखाके छैठौंै जिल्ला अधिवेशनमे लौवा कार्यसमिति छनौट सहमतिय प्रणालीमे जैना कहटी विहान ९ बजेसमके लाग बैठक स्थागित करल बा ।
