धनगढीके नगर प्रहरीनहे वाटर रेस्क्यु प्रशिक्षण
पहुरा समाचारदाता
धनगढी, २० असार । धनगढी उपमहानगरपालिकाके नगर प्रहरीहुकनके लाग आजसे वाटर रेस्क्यु प्रशिक्षण तालिम सुरु कैगिल बा । बुधके रोज धनगढी उपमहानगरपालिकाके नगरप्रमुख गोपाल हमालके अध्यक्षतामे हुइल उद्घाटन कार्यक्रम हुइल बा । उपमहानगरपालिकालसे जल उत्पन्न प्राकृतिक प्रकोपके जोखिमे परलहुकनहे उद्दार कैना नगरप्रहरीहे परिचालन कैना रेस्क्यु प्रशिक्षण डेहे लागल नगरप्रमुख हमाल बटैलै ।
कार्यक्रममे नगर उपप्रमुख कन्दकला राना, प्रमुख प्रशासकीय अधिकृत रामलाल श्रेष्ठलगायतके सहभागिता रहल रहे । उद्घाटन पश्चात नगरप्रहरीहुक्रे कैलालीके गोदावरी नगरपालिका–२, अत्तरियामे रहल लामितालमे वाटर रेस्क्यु प्रशिक्षण तालिम करटी रहल बटै । उपमहानगरपालिकाके विपत व्यवस्थापन शाखाके प्रमुख दिपक भण्डारी नगर प्रहरीहे पहिल चो वाटर रेस्क्यु प्रशिक्षण डेहे लागल बटैलै । उहाँ डुवान हुइना पहिले वाढके पुर्व तयारी स्वरुप नगर प्रहरीहे तालिम डेहे ललागल बटैलै ।
उपमहानगरपालिकासे बाढ ओ डुवानके उद्दार सम्बन्धी प्रशिक्षणसंगे खोज तथा उद्दारके लाग आवश्यक सामग्रीकेफे जोहो करल बटैलै । उहाँ नगरमार्फत जिल्ला प्रहरी कार्यालय ओ सशस्त्र प्रहरीहेफे उद्दारके सामग्री हस्तान्तरण करसेकल बटैलै ।
धनगढी उपमहानरपालिकाहहे युएडीपीके सुपर परियोजनासे ३६ लाख ९७ हजार रुप्या बराबरके उद्दार सामग्री उपलब्ध कराइल रहे । धनगढी उपमहानगरपालिकाके नगर प्रहरी नायव निरिक्षक कृष्ण मल्ल विपद व्यवस्थापन तालिमसे वाढ ओ डुवानमे उद्दार कैना सहज हुइना बटैलै । तालिममे स्वुमिङ संगे बोट चलैना सीपफे प्रदान कैना बटैलै ।
२५ जाने नगर प्रहरीके सहभागिता रहल तालिम २३ गते सम संचालन रही तालिममे प्रशिक्षण सशस्त्र प्रहरी बल नेपाल नम्बर ३४ गण कैलाली करैटी रहल बा ।
धनगढीके वडा नम्बर १, २ ओ ३ वर्षातमे डुवानमे परटी आइल बा । धनगढीमे मोहना लडिया, खुटिया लडिया, घुरही लडियामे बाढसे बर्सेनि भारी धनजनके क्षति करटी आइल बा ।
