परिवार नियोजन संघ अध्यक्षमे फेनसे बम
पहुरा समाचारदाता
धनगढी, २३ असार । नेपाल परिवार नियोजन संघ कैलाली शाखाके अध्यक्षमे फेनसे सुरेन्द्र बम चयन हुइल बटैं ।
संघके ३० औँ वार्षिक साधारण सभासे उहाँ फेनसे अध्यक्षमे चयन हुइल बटैं । अस्टेके, संघके कोषध्यक्षमे जनकराज जोशी, महिला सदस्यमे भगवती वडाल, युवा सदस्यमे स्तुति आचार्य ओ मोनिका वड, सदस्यमे रञ्जना जोशी, कुश्मा जोशी, वीरेन्द्र विष्ट ओ शुभाषचन्द्र उपाध्याय चयन हुइल बटैं ।
यकरआगे सभाके जिल्ला समन्वय समितिके कार्यबाहक सभापति खगराज भुषाल एक कार्यक्रमके बीच उद्घाटन करले रहैं । कार्यक्रम संघके अध्यक्ष सुरेन्द्र बमके अध्यक्षतामे हुइल रहे ।
कार्यक्रममे संघके सचिव संगीता न्यौपाने संघके सन् २०२२ मे करल वार्षिक कार्यक्रम प्रतिवेदन ओ संघके सदस्य जनकराज जोशी २०२२ के ५२ लाख हजार ४ सय ८४ रुपैयाँ बराबरके आर्थिक प्रतिवेदन प्रस्तुत करले रहैं ।
उ अवसरमे १५ वर्षसे स्वयम्सेवकके रुपमे काम कैके स्वास्थ्य क्षेत्रमे अमूल्या योगदान पुगाइल कटि जानकी पाठकहे सम्मान फेन करल बा ।
कार्यक्रममे अमित खाती, रामबहादुर देउवा, पुष्पा भट्टलगायत मन्तव्य व्यक्त करले रहैं । कार्यक्रमके सञ्चालन सचिव संगीता न्यौपाने करले रहि ।
