प्रदेश सरकारमे नागरिक उन्मुक्ति पार्टी सहभागी हुइटी
पहुरा समाचारदाता
धनगढी, २४ असार । संघीय सरकारके सत्तारूढ गठबन्धन दल नागरिक उन्मुक्ति पार्टी सुदूरपश्चिम प्रदेश सरकारमे सहभागी हुइना हुइल बा । गठबन्धनबिच केन्द्रमे हुइल सहमति अनुसार उ पार्टी सुदूरपश्चिम प्रदेश सरकारमे सहभागी हुइना हुइल हो ।
उ पार्टीहे सरकारमे सहभागी करैना प्रदेश सरकारके मुख्यमन्त्री कमलबहादुर शाह ओ नागरिक पार्टीके संरक्षक रेशम चौधरीबिच छलफल हुइल मुख्यमन्त्रीके निजी सचिवालय जनैले बा ।
छलफलमे प्रतिनिधि सभा सदस्य गंगाराम चौधरी, भौतिक पूर्वाधार विकासमन्त्री प्रकाश देउवा, नागरिक पार्टीके प्रवक्ता दामोदर पण्डितके फेन उपस्थिति रहल रहे । नागरिक पार्टी प्रदेश सरकारमे जैना निश्चित हुइल उ पार्टीके केन्द्रीय सदस्य एवं प्रतिनिधि सभा सदस्य गंगाराम चौधरी बटैलै ।
“सम्भवतः दुई÷तीन दिनभिट्टरे सुदूरपश्चिम प्रदेश सरकार विस्तार हुइ उहाँ कहलै, हमार पार्टीसे कोइ संघरिया मन्त्रीमे शपथ लेना बाटै ।” ओहकान अनुसार नागरिक पार्टीसे संघमे हुइल सहमति अनुसार दुई मन्त्रीसहित राज्यमन्त्री, दुई समितिके सभापति पाइ पर्ना माग राख्ले बा ।
“हमार माग इहे हो,” उहाँ कहलै, “आब यम्ने कैसिक मिलैना हो, उ प्रदेश सरकार जाने । सरकारसे जत्रा हाली सहमति जुटाइ ओत्रे हाली सरकार विस्तार ओ शपथग्रहण हुइ सेकी ।”
इहीसे आघे मुख्यमन्त्री शाह नेकपा (माओवादी केन्द्र) सहितके गठबन्धन सरकारमे सहभागी कराइक लाग नागरिक पार्टीसँग छलफलके प्रयास करल रहिट । उ पार्टीसे दुईठो मन्त्रालय माग करल रहे मने भूमि, व्यवस्था, कृषि तथा सहकारी मन्त्रालय किल पैना सम्भावना डेखलपाछे सरकारमे नैगैल बटाइल बा ।
उ मन्त्रालय आभिन फेन मन्त्रीविहीन रहल बा । आब भर नागरिक पार्टी सरकारमे जैना बात पार्टीके संरक्षक चौधरी फेन सार्वजनिक करले बाटै । उहाँ एक अँठ्वारभिट्टर सुदूरपश्चिम प्रदेश सरकारमे जैना बात सामाजिक सञ्जालसे सार्वजनिक करल हुइट ।
प्रदेश सभामे चौथो बरवार दल नागरिक पार्टीसे लक्ष्मणकिशोर चौधरी ओ रामेश्वर चौधरी मन्त्री बन्ना लाइनमे रहल बाटै । डुनु जनहनहे मन्त्री बनैना पार्टीके निर्णय रहल बा ।
प्रदेशमे अब्बे नेपाली कांग्रेसके नेतृत्वमे नेकपा (माओवादी केन्द्र) ओ नेकपा (एकीकृत समाजवादी) सम्मिलित संयुक्त सरकार रहल बा । ओस्टके गाडी दुर्घटनामे आन्तरिक मामिला तथा कानुनमन्त्री पृथ्वीबहादुर सिंहके निधन हुइलपाछे कानुन मन्त्रालय फेन मन्त्रीविहीन बनल बा ।
