विपतपुर शिविरके आगलागी पीडितहे लावा घर, परिवारमे खुसी

पहुरा समाचारदाता
धनगढी, २४ असार । कैलारी गाउँपालिका–७, विपतपुर शिविरके २७ आगलागी पीडित मुक्तकमैयाके परिवार लावा घर पाइलपाछे खुसी हुइल बाटै । गैल बरस वैशाख ११ मे आगलागी होके २७ घर जरके नष्ट हुइलपाछे मुक्तकमैयाहुक्रे एक बरससे अलपत्र तथा झोप्रीमे बैठ्टी आइल रहिट ।

लग्गेक खेट्वामे गोहुँक लर्वामे लगाइल आगी दिनके हावा चलल् बेला बस्तीमे लागल रहे । घरसहित लुगाकपडा ओ बालबालिकाके कापी–किताब समेत बचाइ नैपाइल आगलागी पीडित तेजराम चौधरी बटैलै । उहाँ घर जरके राख हुइलपाछे दुई महिना खेट्वामे टेन्ट लगाके बैठ्ली । बर्खामे डुबान हुइना हुइल ओरसे खेट्वामे बैठ्ना सम्भव नैरहे । जरल घरमे हल्का छाप्रा छाँके बैठल उहाँ बटैलै । अब्बे सुदूरपश्चिम प्रदेश सरकार ओ दातृनिकायसे विपतपुरके आगलागी पीडित २७ मुक्तकमैया परिवारके लाग लावा पक्की घर बना डेहल बावै ।

मुक्तकमैया बस्तीमे आगलागी पीडितके लाग दुईठो कोठा ओ एकठो भान्सा रहल ओ टिनसे छाइल २७ ठो पक्की घर निर्माण करसेकल बावै । ओस्टके कैलारी गाउँपालिका–७, विपतपुरके राजकुमार चौधरी पक्की घर निर्माणके काम भर्खरे सम्पन्न हुइलपाछे लावा घरमे सरल बटैलै । एक बरससे पाँचजनहनके परिवारसहित कच्ची झोप्रीामे बैठ्टी रहल उहाँ लावा पक्की घर पाइल पाछे खुसी रहल बाटै । सुरुमे दुई महिनासम खेट्वामे त्रिपाल टाँगके बैठल उहाँ बर्खामे त्रिपालमे बैठ्ना सम्भव नैहुइल बटैलै ।

ओकरपाछे लावा घर बनाइक लाग पैसा नैहुइलपाछे आगलागीसे जरल टिनसे छाँके उहाँ पुराने घरक किनारमे झोप्रा बनाइल रहिट । लावा घरमे बैठे पाइलपाछे ढेर सहज हुइल ओ आब बर्खामे साँप गोजरके डर नैरहना बटैलै ।

ओस्टके आगलागी पीडित बेलमती चौधरी झोप्रीके समस्या हट्लेसे फेन बरवार परिवार रहल अओरसे दुईकोठे घर अपुग हुइना बटैली । कैलारी गाउँपालिकासे २७ आगलागी पीडित मुक्तकमैया परिवारके लाग एक करोड ८२ लाख १२ हजार लागतमे लावा पक्की घर निर्माण करल जनैले बा ।

प्रदेश सरकारके ९० लाख ओ ह्याबिटेट फर ह्युमानिटी नेपाल नामक गैरसरकारी संस्थाके ५४ लाख लगानी ओ घर निर्माणमे लाभग्राही परिवार ३८ लाख १२ हजार बराबरके श्रमदान करल रहिट ।

आगलागी पीडित मुक्तकमैयाके सुरक्षित घर निर्माण समितिके अध्यक्ष हरिप्रसाद चौधरी सक्कु घरके निर्माण कार्य ओराइल ओ कुछ दिनमे घर हस्तान्तरण करजैना बटैलै । ढेर समस्यामे रहल ओ घर बनलपाछे बैठ्ना सजिल हुइल अग्नि पीडितसमेत रहल उहाँ बटैलै । आगलागीसे करोडौँके क्षति हुइलेसे फेन दिनके समयमे रहल ओरसे मानवीय क्षति भर हुइ नैपाइल उहाँ बटैलै ।