तीन महिने आल्मुनियम फेब्रिकेटर तालिम
पहुरा समाचारदाता
हसुलिया, २५ असार । कैलारी गाउँपालिका वडा नम्बर ४ ओ व्यावसायिक तथा सीप विकास तालिम केन्द्र धनगढीके सहकार्यमे तीन महिने आल्मुनियम फेब्रिकेटर तालिम निम्जल बा ।
वेरोजगार यूवाहुकन सीप प्रदान कैके स्थानीय स्तरमे रोजगारी सृजना करेक कैलारी गाउँपालिका वडा नम्बर ४ मे गैल चैत २३ गतेसे सुरु हुइल ३९० घण्टे तालिम एक कार्यक्रमके विच समापन हुइल हो । तालिम समापन कार्यक्रम व्यावसायिक तथा सीप विकास तालिम केन्द्र धनगढीके प्रमुख भुवन पन्तके वडका पहुनामे हुइल रहे । कार्यक्रममे बोल्टी उहाँ यहाँके यूवाहुक्रे टमान मेरिक सीपमे आघे बह्रल बटैलै । कौनोफे कामके लाग भारतसे मिस्त्री बोलैना अवस्था रहे । अब्बे नेपाली यूवा मेरमेराइक सीपमे निपुण हुइल उहाँ बटैलै ।
कैलारी गाउँपालिका वडा नम्बर ४ के वडा अध्यक्ष ठागगुराम चौधरीके अध्यक्षता कार्यक्रममे उहाँ बेरोजगार यूवाहुकन सीप प्रदान करके स्थानीयस्तरमे रोजगारी सृजना करेक लाग पालिकासे तालिमके आयोजना करल बटैलै ।
अब्बे झयाल ढोका, टमान मेरिक डेकुरेशन करेक आल्मुनियन ढेर चलन चल्टी आइ लागल बा, वडा अध्यक्ष कहलै, सीप सिख्लेसे रोजगारी पैना सहजुल हुई । बनुवासे कठुवा पैना कर्रा हुइल लागलपाछे कठुवक झयाल ढोका, चौैखतके विकल्पके रुपमे आल्मुनियम आइलफे उहाँ बटैलै ।
कार्यक्रममे वडा सदस्य सुवा परियार, प्रशिक्षक धनकुमार चौधरी, प्रशिक्षार्थी जीतबहादुर चौधरी लगायतसे मन्तव्य व्यक्त करल रहित । तालिममे सहभागीहुकनहे वडा सदस्य मोहनलाल चौधरी, भल्मन्सालगायतसे प्रमाणपत्र वितरण करल रहिट । कार्यक्रमके संचालन वडा सचिव श्रीप्रसाद चौधरी करल रहि । तालिममे २० जानेक सहभागिता रहे ।
