विशेषज्ञ वडा स्वास्थ्य क्लिनिकके लाग विद्युतीय गाडी

पहुरा समाचारदाता
धनगढी, २५ असार । धनगढी उपमहानगरपालिकासे गैल बरससे ‘विशेषज्ञ वडा स्वास्थ्य क्लिनिक’ सञ्चाल कैटी आइल बा । सम्वन्धित वडामे विशेषज्ञसहितके टीम पुगके उपमहानगरपालिकासे विशेषज्ञ सेवा उपलब्ध करैटी आइल बा ।

यकर लाग उपमहानगरपालिकाके नगरप्रमुख गोपाल हमाल आपन चहुरना गाडी नै स्वास्थ्य शाखाहे हस्तान्तरण कैके सेवा सञ्चालनके सुरुवात करल रहिट । अइसीन सेवा सुरु हुइलपाछे विशेषज्ञ चिकित्सकीय सेवाके लाग धनगढीस्थित सेती प्रादेशिक अस्पताल आइ पर्ना बाध्यता कम हुइल बा ।

नगर प्रमुख हमाल चुनावी एजेन्डामे ‘विशेषज्ञ वडा स्वास्थ्य क्लिनिक’ सेवा सुरु कैना कार्यक्रम राखल रहिट । उपमहानगरके नीति ओ कार्यक्रममे प्राथमिक योजनामे रहल वडा क्लिनिक सेवा गैल बरस सुरुक दिनमे नगर प्रमुख हमाल सुरु करल रहिट । विशेषज्ञ वडा क्लिनिक सेवाके उद्घाटन तत्कालिन मुख्यमन्त्री त्रिलोचन भट्ट करल रहिट । तत्कालिन मुख्यमन्त्री भट्ट धनगढी उपमहानगरसे सुरु करल महिनामे एक दिन एक वडामे विशेषज्ञ स्वास्थ्य क्लिनिक सञ्चालनके सिको सुदूरपश्चिम प्रदेशके सक्कु स्थानीय तहहे कैना आग्रह समेत करल रहिट ।

‘स्वास्थ्य सेवाहे सबके पहुँचमे पुगैना ओ सुधार कैना हो कलेसे विशेषज्ञ वडा स्वास्थ्य क्लिनिक सञ्चालनसे ढेर मद्दत पुगैना बा । प्रदेश सरकार इ मेरके प्रभावकारी कार्यक्रममे साझेदारी कैना तयार बा,’ उहाँ कहल रहिट ।

नगर प्रमुख हमाल ‘विशेषज्ञ वडा स्वास्थ्य क्लिनिक’ साझेदारी योजनाके रूपमे सञ्चालनमे लानल बटैलै ।‘आपन कार्यकालके बाँकी चार बरस निरन्तर इ ‘विशेषज्ञ वडा स्वास्थ्य क्लिनिक’ सञ्चालनमे रहना,’ उहाँ कहलै, ‘इहीहे उपमहानगरसे साझेदारी कार्यक्रम तथा योजनाअन्तर्गत रख्ले बा । सक्कु जनहनके सहयोग फेन चाहल बा । ’ उहाँ मुर्गी बेचके उपचारके लाग धनगढीके अस्पताल आइ पर्ना दिनके अन्त्य कैना उद्देश्यसे इ कार्यक्रम लागू करल बटैलै ।

ओहकान अनुसार दुई फिजिसियन ओ स्त्रीरोग विशेषज्ञ डाक्टरके मासिक २÷२ लाखके दरसे चिकित्सकीय शुल्क भाटभटेनी सुपर मार्केटसे पाँच बरससमके लाग बेहोर्न सम्झौता धनगढी उपमहानगरसँग करले बा । ‘खास कैके ग्रामीण महिलाहे स्वास्थ्य सेवा पहुँचसे डुर रहल बाटै,’ हमाल कहलै, ‘प्रसूति तथा स्त्रीरोग विशेषज्ञ वडा क्लिनिकमे बाटै । इ एक मेरके आमा बचाउ कार्यक्रम कलेसे हुइठ् ।’

उपमहानगरके १९ वडा नम्बरसे सुरु क्लिनिक’ प्रत्येक वडामे महिनाके एक दिन सञ्चालन हुइटी रहल बा । वडा क्लिनिक सेवाहे थप प्रभावकारी बनाइक लाग उपमहानगरपालिके विद्युतीय गाडी खरिद कैके सोम्मारके स्वास्थ्य शाखाहे हस्तान्तरण समेत करल बा ।

१५ सिट क्षमताके गाडी स्वास्थ्य शाखाहे हस्तान्तरण करल हो । विद्युतीय सवारी साधन वडा क्लिनिकके लाग खरिद करलपाछे औषधि ढुवानीके साथे विशेषज्ञ चिकित्सक वडावडामे जाके सेवा कैना सहज हुइना उपमहानगरपालिकाके स्वास्थ्य शाखा प्रमुख योगेश अवस्थी बटैलै । ‘इहीसे आघे नगरप्रमुख ज्यु आपन चढना गाडी उपलब्ध कराइल रलेसे फेन सिट क्षमता कम होके समस्या रहे । आब १५ सिट क्षमताके विद्युतीय गाडी नै उपलब्ध कराइलपाछे सोम्मारसे वडा नम्बर ८ से काम सुरु करल बा ।’