ग्यालेक्सीके छात्रा नितु एसईईमे लन्ली ४ जिपीए
पहुरा समाचारदाता
धनगढी, २७ असार । धनगढी उपमहानगरपालिका वडा नम्बर ५ हसनपुरस्थित ग्यालेक्सी माध्यमिक विद्यालयके छात्रा नितु विष्ट राष्ट्रिय परीक्षा बोर्ड(एसईई) से लेहल परीक्षामे उत्कृष्ट नतिजा प्राप्त करले बाटी ।
२०७९ के परीक्षामे उहाँ सुदूरपश्चिम प्रदेशमे नै उच्च औषत ग्रेड ४ जिपीए प्राप्त करल विद्यालयके प्रिन्सिपल छत्रराज पण्डित जानकारी डेलै । परीक्षामे सहभागी ६१ विद्यार्थी मध्ये ५ जाने विद्यार्थी ३.६ से ४ जिपीए लानल, १४ जाने विद्यार्थी ३.२ से ३.५९ जिपीए लानल, २२ जाने विद्यार्थी २.८ से ३.१९ जिपीए लानल, १६ विद्यार्थी २.४ से २.७९ जिपीए लानल ओ ४ विद्यार्थी २ से २.३९ जिपीए लानल प्रिन्सिपल पण्डित जानकारी डेलै ।
२०५० सालमे स्थापना होके विद्यालय निरन्तर गुणस्तरीय शिक्षा प्रदान करटी आइल बा । विद्यालयसे राष्ट्रिय परीक्षा बोर्डसे सञ्चालन करल कक्षा ११ ओ १२ मे समेत उत्कृष्ट नतिजा प्राप्त कैना सफल हुइल बा । २०७५ सालके परीक्षामे कक्षा ११ मे (३.५७) ओ २०७६ सालमे कक्षा १२ के परीक्षामे (३.७१ जिपीए) लानके अभिषेक बगाले प्रदेशमे प्रथम स्थान हासिल करल रहिट ।
ओस्टके २०७६ ओ ०७७ सालके परीक्षामे कक्षा ११ मे (३.८१ जिपीए) ओ १२ मे (४ जिपीए) लानके सुगम शर्मा सुदूरपश्चिम टपर हुइल प्रिन्सिपल पण्डित जानकारी डेलै ।
विद्यालयके भाइस प्रिन्सिपल उपेन्द्र सुवेदी विद्यार्थीनके अभिभावक ओ विद्यार्थी बीच निरन्तर सम्पर्क तथा अन्तरक्रियाके कारण विद्यालयसे उत्कृष्ट नजिता लन्ना सफल बटैलै ।
ग्यालेक्सी माध्यमिक विद्यालयमे कक्षा नर्सरीसे कक्षा १२ सम पह्राइ हुइटी आइल बा । विद्यालयमे प्लस टु ओर विज्ञान ओ व्यवस्थापन पह्राइ हुइना जनाइल बा ।
कलेसे इहे बरस स्नातक तहमे बिबिएस कक्षा समेत सञ्चालन हुइना जनाइल बा । विद्यालय व्यवस्थापन समितिके अध्यक्ष मोहन राज भट्ट त्रिभुवन विश्वविद्यालयसे सम्बन्धन प्राप्त कैके शैक्षिक सत्र २०८० से बिबिएसके कक्षा सञ्चालन कैना जानकारी डेलै ।
