धनगढी उपमहानगरपालिकाके स्वास्थ्यकर्मी आन्दोलित

पहुरा समाचारदाता
धनगढी, १ सावन । धनगढी उपमहानगरपालिकासे समायोजन मिलान हुइल स्वास्थ्यकर्मीहे हाजिर करे नैडेहलपाछे स्वास्थ्यकर्मी आन्दोलित हुइल बाटै ।

उपमहानगरसे अन्याय हुइल कहटी स्वास्थ्यकर्मीहुक्रे आन्दोलित हुइल हुइट । उहाँहुक्रे सोम्मारके उपमहानगरभित्रे धर्ना कार्यक्रम सुरू करले बाटै ।

नयाँ आर्थिक बरस सुरू हुइलसँगे उपमहानगरसे ३३ जाने स्वास्थ्यकर्मीहे हाजिर नैकरे डेना कहटी पत्र पठाइल रहे । धनगढीमे समायोजनमे कार्यरत स्वास्थ्यके कर्मचारी आपनउपर अन्याय हुइल कहटी सरोकारवाला निकायहे इहीसे ध्यानाकर्षण पत्र फेन बुझाइल रहिट ।

उपमहानगरसे आपनहे सावन १ गतेसे विकल्प नैडेके हाजिर करे नैडेना हुइलपाछे उ पत्र बुझाइल उहाँहुक्रनके कहाइ रहल बा । शुकके मुख्यमन्त्री कमलबहादुर शाह, धनगढी उपमहानगर, जिल्ला प्रशासन लगायतके कार्यालयमा पत्र बुझाइल हुइट ।