स्थानीय सरकारसे हुइना माग पुरा कैबीः गापा अध्यक्ष

पहुरा समाचारदाता
हसुलिया, २ सावन । कैलारी गाउँपालिकामे मंगरके रोज २३औं मुक्तकमैया दिवस मनागिल बा ।

मुक्तकमैयाहुकनके सामाजिक आर्थिक सम्बृद्धि कना नाराके साथ मुक्त कमैया महिला विकास मञ्चके आयोजनामे गाउँपालिका अध्यक्ष राजसमझ चौधरीके वडका पहुना ओ गाउँपालिका उपाध्यक्ष भगवतीकुमारी चौधरीके विशिष्ट पहुनामे २३औं मुक्ती दिवस भव्यताके साथ मनागिल हो ।

कार्यक्रममे सम्बोधन करटी गाउँपालिका अध्यक्ष राजसमझ चौधरी स्थानीय स्तरसे करे सेक्ना मुक्तकमैयाहुकन माग सम्बोधन कैना बटैलै । उहाँ कहलै, स्थानीय सरकारहे सक्कु अधिकार डेहल नइहो । कौनो प्रदेश टे, कौनो संघीय सरकारसे पुरा कैना माग रहल बटै । स्थानीय सरकारसे हुइना माग पुरा कैजाई ।

कैलारी गाउँपालिका टमान ठाउँमे बैठल मुक्तकमैयानहे बन कार्यालयहे हटाई उहाँ पहल कैना बटैलै । वन कार्यालयसे स्थानीय सरकारहे विन जानकारी निकारल सूचना प्रति गम्भीर ध्यानाकर्षण हुइल बटैलै । सरकारसे कमैया मुक्तीके घोषणा करल मने अभिन ढेर मुक्तकमैया पुनस्थापना हुई नइसेकल कारण एकजुट होके आवाज उठैना उहाँ आग्रह करले । ओस्टेक करके अइना दिनमे स्थानीय विदाके साथे पालिकासे समन्वय कैके कमैया मुक्ती दिवस मनैना बटैलै ।

गाउँपालिका उपाध्यक्ष भगवतीकुमारी चौधरी मुक्ती घोषणा कमैयाहुक्रे मालिकाके आर्थिक, शारिरीक शोषणमे परल बटैली । उहाँ कहली, मालिकके छावा छाई विद्यालय जैना मने कमैयाके लर्काभर छेगरहुवा, कमलरी बैठनाके कारण ओइने पाछे परल बटैली ।

२०५७ सालमे मुक्त घोषणा कैके कुछ काम आघे बह्राइल ढेर मुक्तकमैया पुनस्र्थापना हुइलै । कुछ मुक्तकमैया पुनस्र्थापनाके बञ्चित रहल उहाँ बटैली । संघीय सरकारसे आइलपाछे पुनस्र्थापनाके काम काहे रुकल उहाँ प्रदेश, संघीय सरकारसे प्रश्न करली । मुक्तकमैया माग जायज बा । सरकार पुरा कैना जरुरी रहल उहाँ बटैली । मुक्त हुुइल कारण अब्बे अपन संस्कृति, खानापान सहिट मुक्ती दिवस मनाई पााइलफे उहाँ बटैली । कुछ समस्या समाधान हुइल बा । कुछ ज्यूके त्यू बा । गाउँपालिका उपाध्यक्ष कहली ।

कार्यक्रममे वडा नम्बर ७ वडा अध्यक्ष तथा प्रवक्ता दिपेन्द्र बम वडा नम्बर ७ से नापजोख काम सुरुवाट हुसे निस्सा वितरण करटी रहल बटैलै । मुक्तकमैयाहुक्रे ढेर समस्यामे रहल ओरसे पालिकासे हुइना माग पुरा कैना तत्पर रना उहाँ बटैलै । २०५७ सालमे नेपाली काँग्रेस नेतृत्वके सरकार कमैया मुक्ती घोषणा कैटी ऋणफे मिनाहा करुवाइल उृहाँ बटैलै ।

मुक्त कमैया महिला विकास मञ्चके कार्यक्रम संयोजक इन्द्र चौधरी मुक्तकमैयाहुकनहे पुनस्र्थापना संगे शिक्षा रोजगारीके आवश्यकता रहल बटैलै । उहाँ कहलै, मुक्तकमैया परिवारके बालबालिका पहिले शिक्षासे बञ्चित हुइलेसे अब्बे आघे बह्रल बटैलै । सीप सिखलहुकन अवसरके खाँचो रहलफे उहाँ बटैलै ।

र्यक्रममे वडा नम्बर ३ मोहनपुरके रिया चौधरी मुक्तकमैया बैठल ठाउँकके लालपुर्जा ओ प्रमाणपत्रफे नइपाइल बटैली । विद्यालयके नाउँमे ठोरचे जग्गा रहल मने छाडा गोरुनके कारण खेतीपाटी बचैनाफे कर्रा रहल बटैली । लडिया कटान रोकेक लाग भौतिक तटबन्धके माग उहाँ करल रहिट ।

कैलारी गाउँपालिका वडा नम्बर ७ मिलनपुर बस्तीके अगुवा विनोद चौधरी गाउँपालिका अध्यक्षहे आठ माग सहिट ज्ञापनपत्र बुझैटी मुक्तmकमैयाके माग ओ मुद्दाप्रति गम्भीर हुके जैना आग्रह करल रहिट । कैलारीके मिलनपुर, सपना शिविर, ओमनगर ओ सम्झना शिविरमे समस्या रहल बटैलै । बन कार्यालयसे मुक्तकमैया बस्ती हटैना सूचना जारी करेबेर ट्रास बह्रल उहाँ बटैलै ।
सपना शिविरके भल्मन्सा जगलाल चौधरी २०६३ सालसे बैठल मने नाँपजोख नइकैगैल बटैलै । अपन टोलमे डगरमे हिला हुइल कारण ग्राभेल दारडेना माग रख्लै ।

कैलारी गाउँपालिका वडा नम्बर ३ ओमनगरके पुनाराम चौधरी अपनेहुक्रे कमैया मुक्ती घोषणा करल मने पुनस्र्थापना नइकरल बटैलै । ओमनगरमे संग्गे बैठल मुक्तकमैया कोइ जग्गा कोई नइपाइल कारण मुक्तकमैया विच दैनिक विवाद हुइल बटैलै ।

कैलारी गाउँपालिका वडा नम्बर ४ सुन्दरपुर शिविरके सुग्री चौधरी कमैया बैठल बेला मालिवक शोषणमे परल अनुभव सुनैली । उहाँ कहली, मालिक खाना खाइट टे बेनाफे हौके परे, आधा पेट, बासी भात खाइलफे उहाँ अनुभव सुनैली । पुनस्र्थापनाके काम बाँकी रहलसंगे छुट मुक्तकमैया रहल ओरसे तथ्यांक संकलन कैना उहाँ आग्रह करली ।

कैलारी २ उजलीशेमरके पतिराम चौधरी मुक्तकमैयाहुुक्रनके अपन जग्गा नइरहल कारण अधिया बटैया कैके गुजारा चलाइल बटैलैै । उहाँ कहलै, औरे जानेक जग्गामे लगानीफे लगाई नइमिलथ । जिहीसे मुक्तकमैया मारमे परल बटै । छोट उमेरके लर्कन पह्रैना सहजुल रहल मने उच्च शिक्षा पह्रैना कर्रा रहल उहाँ बटैलै ।

कार्यक्रममे हेमलत्ता चौधरी, गीता चौधरीलगायतसे मन्तव्य व्यक्त करल रहिट । मुक्त कमैया महिला विकास मञ्चके अध्यक्ष सीमा चौधरीके अध्यक्षतामे हुइल कार्यक्रमके संचालन मञ्चके फिल्ड सहजकर्ता रकेश चौधरी करल रहिट । कार्यक्रममे वडा अध्यक्षहुक्रे, प्रमुख प्रशासकीय अधिकृत विरबहादुर ऐर, टमान मुक्तकमैैया बस्तीके हजारौ मुक्तकमैयाहुकनके सहभागिता रहे । मुक्ती दिवसके अवसरमे सखिया, झुमरा, एकल नाँचके साथे सचेतनामुलक नाटकफे डेखागिल रहे । ओस्टेक करके कैलालीके चौमालामे प्रदेशस्तरीय ओ टीकापुरमे संघीय स्तरीय कमैया मुक्ती दिवस मनागिल बा ।