सार्वजनिक शौचालयके उत्कृष्ट डिजाइनर पुरस्कृत

पहुरा समाचारदाता
धनगढी, ५ सावन । धनगढी उपमहानगरसे सार्वजनिक शौचालयके दुई उत्कृष्ट डिजाइनरहे पुरस्कृत करले बा । विफेक उपमहानगरसे प्रथम ओ द्वितीय डिजाइनहे पुरस्कार प्रदान करल हो ।

उपमहानगरपालिकासे २०७९ पुस ८ गते सार्वजनिक शौचालय निर्माण कैना प्रतियोगिता करैना ओ प्रथम ओ द्वितीय हुइना डिजाइनहे क्रमशः १ लाख २५ हजार ओ ७५ हजार पुरस्कार डेना निर्णय करल रहे । उहे निर्णयअनुसार पुस ११ गते धनगढीमे निर्माण हुइना सार्वजनिक शौचालयहे अत्याधुनिक बनैना नमुना पेस कैना सोसाइटी अफ नेप्लिज आर्किटेक्ट (सोना)से डिजाइन पेस कैना आग्रह करल रहे ।

उपमहानगरहे प्राप्त हुइल २० नमुनामन्से काठमाडौँके लिटल मोर स्टुडियोके राहुल बज्राचार्य, साजनराज महर्जन ओ जेनिसा खत्रीसे तयार करल शौचालयके नमुना प्रथम हुइल बा । उ डिजाइनअनुसारके शौचालय उपमहानगर प्रांगनमे निर्माण हुइटी रहल बा ।

ओस्टेक करके सविन शिल्पकार, सागर सैँजु ओ निजल लवाजुसे तयार करल डिजाइन दुसरा हुइल बा । ओस्टेक, प्रतियोगितासे टमान १६ ठो डिजाइन छनोट करल बा । उपमहानगरसे नगर क्षेत्रमे स्वीकृत डिजाइनअनुसार सार्वजनिक शौचालय निर्माण कैना नीति लेले बा ।