खोज तथा उद्धार सम्बन्धी तीन दिने तालिम सुरु
पहुरा समाचारदाता
हसुलिया, ७ सावन । कैलालीके कैलारी गाउँपालिका वडा नम्बर १ हसुलियामे विपद पूर्वतयारी तथा प्रतिकार्य कैना ‘खोज तथा उद्धार’ सम्बन्धी तीन दिने तालिमके सुरुवाट हुइल बा ।
मर्सिक्रोप्स नेपालके आर्थिक सहयोगमे सृजनशिल समाजको सृजना (सिसिएस) कैलालीके आयोजनामे आर्थिक विकास मार्फत जोखिम व्यवस्थापन परियोजना अन्र्तगत तालिमके सुरुवाट अँटवारके रोजसे हुइल हो ।
कैलारी गाउँपालिका वडा नम्बर ३ वडा अध्यक्ष तथा विपद व्यवस्थापन समिति संयोजक सन्तराम चौधरीके वडका पहुनामे तालिमके उदघाटन हुइल हो । तालिम उदघाटन कार्यक्रममे उहाँ विपदके वेला खोज तथा उद्धार कार्यदलके सदस्यहुकनके भारी योगदान रहल कहटी विपद आइलबेला जौन अवस्थामेफे खटे पर्ना उहाँ बटैलै । कैलारी गाउँपालिकामे बाढ, आगलागीलगायत विपदके उच्च जोखिममे रहल ओरसे कार्यदलहे चनाख हुके बैठना उहाँ निर्देशन डेलै ।
सिसिएस कैलालीके महासचिव गणेशदेव पार्कीके अध्यक्षतामे हुइल कार्यक्रममे नेपाल रेडक्रस सोसाइटी कैलारी गाउँपालिका सभापति श्रीराम चौधरी, प्रमुख प्रशिक्षक रेडक्रस सोसाइटीके प्रमुख प्रशिक्षक रतन टमट्टालयात मन्तव्य व्यक्त करल रहिट । कार्यक्रमके उदेश्यबारे सिसिएस कैलालीके कार्यक्रम संयोजक मनिराज पाण्डे जानकारी डेहल रहिट ।
कार्यक्रममे संचालन सिसिएस कैलालीके सहजकर्ता मिना चौधरी करल रहिट । वडा नम्बर ३ ओ ७ खोज तथा उद्धार कार्यदलके २५ जानेक सहभागिता रहल बा । तालिममे रेडक्रस सोसाइटीके प्रमुख प्रशिक्षक रतन टमट्टा, मार्कण्डेय उपाध्याय, सरस्वती भाट, चन्द्र साउदलगायतसे प्रशिक्षण डेजैटी हल बा । तालिममे विपदमे परल घाहिलहुकनके सकुशल उद्धार, चोटपटक लागलहुकनहे प्राथमिक उपचार, मुटु ओ फोक्सोके पुनसंचालन प्रक्रिया, खोज तथा उद्धारलगायत विषय वस्तुमे सैद्धान्तिक ओ व्यवहारिक रुपमे प्रशिक्षण डेजैटी रहल बा ।
ओस्टेक करके मर्सिक्रोप्स नेपालके आर्थिक सहयोगमे सृजनशिल समाजको सृजना (सिसिएस) कैलालीके आयोजनामे आर्थिक विकास मार्फत जोखिम व्यवस्थापन परियोजना अन्र्तगत विफेक रोजसे हसुलिया हुइल विपद पूर्व तयारी तथा प्रतिकार्य कैना प्राथमिक उपचार सम्बन्धी तीन दिने तालिमके समापन हुइल बा ।
समापन कार्यक्रममे प्रशिक्षर्थी रेखा चौधरी पहिल, लक्ष्मी चौधरी दुसरा ओ सुनिता चौधरी टिसरा हुइलहे पुरस्कार वितरण कैगिल बा । समापन कार्यक्रममे सहभागी मन्से सिजा चौधरी, रेखा चौधरी ओ संजय कठरिया मन्तव्य व्यक्त करल रहिट ।
