सुदूरपश्चिमके ७९ उम्मेदवारहे जरिवाना
पहुरा समाचारदाता
धनगढी, १० सावन । सुदूरपश्चिमसे प्रतिनिधिसभा सदस्य तथा प्रदेश सभा सदस्य निर्वाचन २०७९ मे निर्वाचन खर्च विवरण सार्वजनिक नइकरुइया ७९ उम्मेदवारहे जरिवाना तोकल बा ।
निर्वाचन आयोगसे बुधके रोज प्रेस विज्ञप्ति जारी करटी प्रतिनिधिसभा सदस्य पदके ३७ जाने उम्मेदवार ओ प्रदेशसभा सदस्य पदके ४२ जनहनहे कानून बमोजिम खर्च विवरण सार्वजनिक नइकरुइया प्रत्येक उम्मेदवारहे १५ हजार रुप्याके दरसे जरिवाना तिरे पर्ना कहटी नाउँ सार्वजनिक करले बा ।
प्रतिनिधिसभा सदस्य पदके कञ्चनपुरके २२ जाने, कैलालीके ५ जाने ओ बैतडीके १० जाने रहल बटै । सुदूरपश्चिममे १६ प्रतिनिधि सभा निर्वाचन क्षेत्र बा । प्रतिनिधि सभा सदस्यके लाग कुल एक सय ३७ उम्मेदवारमध्ये एक सय जाने उम्मेदवार केल खर्च सार्वजनिक करले बटै ।
ओस्टेक करके प्रदेशसभा सदस्यके लाग एक सय ९३ उम्मेदवारमन्से एक सय ५० जाने केल खर्च सार्वजनिक करले बटै । प्रतिनिधिसभा सदस्य तथा प्रदेश सभा सदस्य निर्वाचन गैल अगहन ४ गते निम्जल रहे । निर्वाचन आयोग ऐनमे निर्वाचनके अन्तिम परिणाम घोषणा हुइल ३५ दिनभिटर खर्च विवरण बुझाई पर्ना व्यवस्था बा ।
२०७९ साल अगहन ४ गते निम्जल प्रतिनिधि सभासदस्य तथा प्रदेशसभा सदस्य निर्वाचनमे उम्मेदवारी हुके कानूनसे तोकल समयभिटर प्रदेश वा जिल्ला निर्वाचन कार्यालयमे निर्वाचन खर्चके विवरण पेश कैना प्रतिनिधि सभाओरके २ हजार ३७४ जाने ओ प्रदेश सभाओरके ३ हजार १८८ जाने करके कुल ५ हजार ५६२ जाने उम्मेदवार रहल रहिट ।
निर्वाचन (कसूर तथा सजाय) ऐन, २०७४ के दफा ३१ के उपदफा (२) बमोजिम २०८० बैशाख ६ गतेसे १२ गतेसम निर्वाचन खर्चके विवरण सार्वजनिक करल लिखित जानकारी अपने उम्मेदवार रहल प्रदेश वा जिल्ला निर्वाचन कार्यालयमे करैना निर्देशन डेहल रहे । तोकल समयभिटर निर्वाचन खर्चके विवरण सार्वजनिक नइकैना प्रतिनिधि सभाओरके १ हजार ३७ जाने ओ प्रदेश सभाओरके १ हजार ३९८ ाने करके २ हजार ४३५ जाने उम्मेदवारहुकनहे निर्वाचन (कसूर तथा सजाय) ऐन, २०७३ के दफा ३१ के उपदफा (४) बमोजिम जनही रु. १५ हजार रुप्याके दरसे जरिवाना कैना निर्णय हुइल आयोग जनैले बा ।
जरिवाना लागल उम्मेदवारसे ३५ (पैतीस) दिनभिटर राजस्व दाखिला करके ओकर भौचरसहितके निवेदन निर्वाचन आयोग वा सम्बन्धित निर्वाचन कार्यालयमे पेश कैना आदेश डेना तथा निर्वाचन खर्चके विवरण ७ (सात) दिनभिटर सार्वजनिक करके ओकर जानकारी सम्बन्धित निर्वाचन कार्यालयमे ७ (सात) दिनभिटर निवेदन सहित पेश कैना फेरसे आदेश डेना निर्णय हुइल आयोग जनैले बा ।
जरिवाना वापतके रकम तोकल समयभिटर नइवुझैना उम्मेदवारहुकनहे तत्काल हुइना एक निर्वाचनमे भाग लेहे नइपैना करके रोक लगैना ओ जरिवाना वापतके रकम सरकारी बाँकी सरह असुल उपर कैना केन्द्रीय तहसिल कार्यालयमे लिखके पठैना निर्णय हुइल बा ।
