प्रदेश सरकारसे सहयोग कैना प्रतिवद्धता बाः मुख्यीमन्त्री शाह

पहुरा समाचारदाता
धनगढी, ११ सावन । कैलालीके गेटामे यिहे सावन महिनाभिटरे संचालन हुइना तयारीमे रहल सहिद दशरथचन्द राष्ट्रिय स्वास्थ्य विज्ञान विश्वविद्यालयके सुदूरपश्चिम प्रदेशके मुख्यमन्त्री कमलबहादुर शाह अनुगन निरिक्षक करले बटै ।

गेटामे सञ्चालन हुई जैटी रहल अस्पतालके बिफेक रोज भौतिक संरचना ओ तयारीके अवस्थाबारे जानकारी लेहे पुगल उहाँ जैसिनफे सहयोग कैना तयार रहल प्रतिवद्धता जनैले बटै । पछिल्का बार संघीय सरकारसे सहिद दशरथचन्द राष्ट्रिय स्वास्थ्य विज्ञान विश्वविद्यालय बनैना निर्णय करल गेटा मेडिकल कलेज प्रदेशके लाग गौरवके योजना रहल ओरसे सुदूरपश्चिम प्रदेश सरकारके फे भूमिका रहे पर्ना उहाँके कहाई बा ।

“संघीय सरकारसे यहाँ जौन कार्य आघे बह्रैले बा, ओम्ने प्रदेश सरकारके पूर्ण साथ, समर्थन ओ सहयोग बा”, मुख्यमन्त्री शाह आघे ठप्लै,“यिहीहे द्रूत गतिमे आघे बह्राइक लाग फे हम्रे आग्रह करटी ।” तत्कालहे मेडिकल कलेज वा विश्वविद्यालय बनैना कार्यहे थाती धारके संघीय सरकारसे गेटामे एक सय शøयाके साधारण अस्पताल सञ्चालनके तयारी करटी रहल बा ।

साउन मसान्तसे अस्पताल सञ्चालनमे नन्ना तयारी हुइटी रहल बा । अस्पताल सञ्चालनके लाग जनशक्ति व्यवस्थापन कार्यमेफे प्रदेश सरकार सहयोगके लाग तत्पर रहल मुख्यमन्त्री शाह बटैलै । उहाँ छ सय शøयाके अस्पताल सञ्चालनमे समेत प्रदेश सरकार हरेक कोणसे सहयोग करटी जोरे चाहल उल्लेख करलै ।

“ओकर लाग छलफलके प्रक्रिया आघे बढाइल बटी”, उहाँ कहलै । नीतिगत रुपमे गेटामे विश्वविद्यालय बनैना बाट आघे अइलेसेफे बजेटमे कुछ छुटलपाछे प्रदेश सरकारसे स्वास्थ्य विज्ञान विश्वविद्यालय बनाइक लाग संघीय सरकारके ध्यानाकर्षण कराइल मुख्यमन्त्रीके कहाई रहे । उहाँ आब केन्द्र सरकारसे विश्वविद्यालय बनैना विषयमे अपन निर्णय आघे बह्रासेकल ओरसे अस्पताल सञ्चालन ओ विश्वविद्यालय बनैना बाटमे कौनो कन्फ्युजन नइरहल उल्लेख करलै । “गेटा अस्पताल ओ विश्वविद्यालय सञ्चालन कैना बाटमे आब कौनो कन्फ्युजन नइरही”, मुख्यमन्त्री शाह कहलै,“कौनो कारणसे संघीय सरकारसे करे पर्ना सहयोग ओ निर्णय डेहे नइसेकलेसे भर सुदूरपश्चिम प्रदेश सरकार अपनही कैना तयार बा ।”

६०० शøयाके अस्पतालसहित राष्ट्रिय स्वास्थ्य विज्ञान विश्वविद्यालय सञ्चालनके लाग टमान प्रयोजनके ५२ ठो भवन बने पर्ना बा । मने, हालसम ३२ ठो भवन बनल ओ और भौतिक संरचना बन्न बाँकी रहल ओरसे संरचना समयमे निर्माण कैना ओरफे ध्यान डेना आवश्यक रहल मुख्यमन्त्रीसे सजग करैलै । “सक्कु संरचना नइबन्लेसे ६०० शøयाके अस्पतालसहितके विश्वविद्यालय बने नइसेकी”, उहाँ ठप्लै,“टबमारे हम्रे सरोकारवालाहुक्रे यहोर ओरफे ध्यान डेना आवश्यक बा ।”

उ क्रममे निर्देशक डा. प्रमोद जोशी एक सय शøया अस्पताल सञ्चालनके लाग हुइटी रहल तयारीके बारेमे मुख्यमन्त्रीहे जानकारी करैलै । उहाँ कहलै, कुछ जनशक्ति दरबन्दी हुसेकल बा, बाँकी रहल दरबन्दी तत्काल पुरा हुइटीकी यिहे साउन महिनासे १०० शैयाके ओपिडिसहिट अस्पताल संचालन करे सेक्जाईं ।

अनुगमनमे आर्थिक मामिला मन्त्री नरेशकुमार शाही, सामाजिक विकास मन्त्री झपटबहादुर साउँद, राज्यमन्त्री गीता माल, प्रदेश सभा सदस्य प्रकाशबहादुर बम, तुल्सी देवकोटा, जानकी पौडेल लगायतके सहभागिता रहल रहे ।