मञ्जु रावल हत्या प्रकरणमे संलग्न ४ जाने पक्राउ
पहुरा समाचारदाता
धनगढी, १५ सावन । कैलाली लम्कीचुहा नगरपालिका वडा नं. ४ भल्का बैठना मञ्जु रावलके हत्या आरोपमे चार जाने पक्राउ परल बटै ।
जेठ २५ गते वकिलहे भेटे मसुरीया जैम कहिके गैल ओ उहे दिनके साँझसे मोर डाई मञ्जु रावलके मोबाईल समेत बन्द रहल ओरसे खोज तलास करी पाँउ कहिके मञ्जुके छावा बिवेक रावल २०८० असार १ गते ईलाका प्रहरी कार्यालय लम्की कैलालीमे निवेदन डेहल रहिट ।
उ घटनाके अनुसन्धान कैना क्रममे मञ्जु रावल ओ गोमा रावल बिच अंशके बिषयहे लेके बिबाद हुइटी रहल कना खुले आइल घटना संकास्पद लाग थप अनुसन्धान कैगिल रहे, जिल्ला प्रहरी कार्याल कैलालीके प्रहरी प्रवक्ता कुलदिप चन्द कहलै ।
विवादित जग्गाके बिषयहे लेके मञ्जु रावलके हत्या कैना योजना बनाके जिल्ला कैलाली लम्कीचुहा नगरपालिका वडा नं. ४ भल्का बैठना बर्ष ४० के गोमा रावल, बर्षा रावल, बर्ष २४ के भरत रावल, जिल्ला अछाम पञ्चदेवल विनायक न.पा. ६ तोलि बैठना बर्ष ३७ के सरिता रावल समेतसे हत्या करल खुले आइल प्रहरी प्रवक्ता चन्द बटैलै । ओइनहे टमान स्थानसे पक्राउ करल रहे ।
सावन १४ गते साढे ३ बजे प्रतिबादी सरिता रावलके वयान तथा निजसे डेखाइल स्थान जिल्ला कैलाली मोहन्याल गा.पा.वडा नं. ५ स्थित बाँसघारी सामुदायिक वनके सेतीखोर खोलासे अन्दाजी २०० मिटर पश्चिम ओर खोल्सामे ढुङगा तरे डबाके धारल ओ कुछ भाग वरपर छिटकल हडडी (कंकाल) टुक्रा–टुक्रा फेला परल, उहे हडिडमे बेरहल गुलाबी रंगके कुर्ता शुरुवालसे मृतक मञ्जु रावलके छावा बिवेक रावल मोर डाईक कुर्ता शुरुवाल हो कहिके चिन्हल रहिट । प्रहरीसे थप अनुसन्धान तथा कानुनी कारबाही हुइटी रहल जनैले बा ।
