युनिक नेपाल वार्षिक प्रगति समिक्षा कार्यक्रम

निर्मल राजा
धनगढी, २१ सावन । युनिक नेपाल लघुवित्त वित्तीय संस्था लिमिटेडसे अपन वार्षिक प्रगति समिक्षा कार्यक्रम सुरु करले बा ।
युनिक नेपाल लघुवित्त वित्तीय संस्था लिमिटेडसे शनिच्चर ओ अँटवारके रोज कैलाली जिल्लाके धनगढीमे एक कार्यक्रमके आयोजना करके संस्थाके वार्षिक प्रगति समिक्षा कार्यक्रम सञ्चालन करल हो ।

वार्षिक प्रगति समिक्षा कार्यक्रमके सभापति युनिक नेपाल लघुवित्त वित्तीय संस्था लिमिटेडके कार्यकारी निर्देशक लघुवि विज्ञ तथा सामाजिक अभियन्ता डा.गोपाल दहित रहल बटै । कार्यक्रममे बोल्टी युनिक नेपाल लघुवित्त वित्तीय संस्था लिमिटेडके कार्यकारी निर्देशक लघुवित्त विज्ञ तथा सामाजिक अभियन्ता डा.गोपाल दहित भावी मार्गचित्र, नीति तथा कार्यक्रम, उद्यमशिलता विकास, कर्मचारीहुकनहे लक्ष्य प्रदान कैना बटैलै । साथे संस्थाके परिवर्तित नीति नियमबारे जानकारीसंगे सहजीकरण कैना बटैलै ।

युनिक नेपाल लघुवित्त वित्तीय संस्था लि.के मानव संसाधन विभाग प्रमुख मानबहादुर थारु, कार्यक्रम उप्पर प्रकाश परटी २ दिन सम सञ्चालन हुइना वार्षिक समिक्षा कार्यक्रममे संस्थाहे आघे बह्रैना ओ हालके प्रगतीके अवस्था, शाखामे हुइल गतिविधी, कार्ययोजना, रणनीतिक लक्ष्य, सल्लाह सुझाव, नीतिगत ज्ञानशिप लगायतबारे छलफल हुइना बटैलै ।

कार्यक्रममे विशिष्ट पहुना युनिक नेपालके युनिक नेपाल लघुवित्त वित्तीय संस्था लिमिटेडके सञ्चालक समिति सदस्य तथा अधिवत्ता सन्तराम धरकटुवा थारु ओस्टेक करके सञ्चालक समिति सदस्य समाजसेवी पुरनप्रसाद चौधरी, सञ्चालक समिति सदस्य बालिका चौधरी, स्वतन्त्र सञ्चालक समिति सदस्य जागेश्वर प्रसाद चौधरी, लघु वित्त सेक्सन विभाग प्रमुख मदन चौधरी, आइटी विभाग प्रमुख रमेश चौधरी, आन्तरिक लेखा परिक्षक तथा अधिकृत बिनोद कुवंर, ईलाका अधिकृत सन्तकुमार चौधरी लगायतके सहभागिता रहल बा ।

उ समिक्षा कार्यक्रममे युनिक नेपाल लघुवित्त वित्तीय संस्था लिमिटेडके सुदुरपश्चिम प्रदेशमे रहल जिल्ला कैलाली, कञ्चनपुर शाखाके कर्मचारीलगायत करिब ८१ जनहनके सहभागिता रहल बा ।

युनिक नेपाल लघुवित्त वित्तीय संस्था लि २०५७ सालसे पाछे पारगिल वर्ग थारु, दलित, मुस्लिम, आदिवासी,जनजाती, सिमान्तकृत समुदाय गरिबीके रेखाटरे रहल महिलाहुकनके लघुवित्त कार्यक्रमसे आर्थिक रुपमे सबल बनैटी आइल बा ।

हाल युनिक नेपाल लघुवित्त वित्तीय संस्था लि संग करिब ९० हजारसे ढेर महिला लघुवित्त सेवा लेटी समुहमे बैठल बटै । युनिक नेपाल लघुवित्त वित्तीय संस्था लि.से कैलाली, कञ्चनपुर, बांके, बर्दिया, दाङ, कपिलवस्तु, करके ६ जिल्लामे ४१ शाखा मार्फत सेवा करटी आइल बा ।