कैलारी गाउँपालिकासे मलमे मोल निर्धारण

पहुरा समाचारदाता
हसुलिया, २२ सावन । कैलारी गाउँपालिकासे रासायनिक मलके मोल निर्धारण करले बा ।

डिलरसिप लेके साल्ट ट्रेडिङ कर्पोरेशन ओ कृषि सामाग्री कम्पनी लिमिटेडसे अनुदानमे नानल मल विक्री वितरणमे एक रुपता नइरहल गुनासो आइलपाछे सोम्मारके रोज स्थानीय तह मल वितरण समितिके बैठकसे मलके मोल निर्धारण करल हो । समितिके संयोजक तथा कैलारी गाउँपालिका उपाध्याक्ष भगवतीकुमारी चौधरीके अध्यक्षता तथा गाउँपालिका अध्यक्ष राजसमझ चौधरीके विषेश आतिथ्यमे हुइल छलफलमे रासायानिक मलके मोल निर्धारण कैगिल बा ।

धनगढीसे नानेबेर मल गाउँपालिकासम पुगाईबेर लग्ना ढुवानी खर्च जोरके मलके मोल निर्धारण करल समितिके संयोजक भगवतीकुमारी चौधरी बटैली । समितिसे निर्धारण करल मलके मोलमे यूरिया प्रतिकट्टा ५० किलोके ११५० रुप्या, डिएपी प्रतिकट्टा ५० किलोके २६ सय रुप्या ओ पोटास प्रतिकट्टा ५० किलोके मोल २ हजार रुप्या निर्धारण कैगिल उहाँ बटैली ।

कैलारी गाउँपालिकाके अध्यक्ष राजसमझ चौधरी डिलर लेहुइया कृषि सहकारीसे विक्री करल मोलमे एक रुपता नइरहल गुनासो आइल बटैलै । उहाँ कहलै, हरेक किसान अनुदानके मल सहुलियत दरमे पैना जरुरी बा । धनगढी नानल मल डगर खर्च निकारके मल बेच्ना ठिक हो मने सहकारीपिच्छे मोल फरक हुई नइपरल । मल अपुग हुइलेसे पालिका सरोकारवालासे कोटा बह्राइक लाग पहल करी ।

कैलारी गाउँपालिकाके १ से ९ वडासम मल खादके विक्री वितरणके लाग ३८ ठो कृषि सहकारीसे डिलर लेले बटै । सरकारसे अनुदानमे डेना मलके मोल धनगढीमे युरियाके प्रति बोरा ९३६ रुप्या ५० पैसा, डिएपी २३ सय ८६ ओ पोटास १७ सय ८६ रुप्या ५० पैसा परठ ।

छलफल कार्यक्रममे कैलारी गाउँपालिका वडा नम्बर ५ के वडा अध्यक्ष विष्ण्ु प्रसाद चौधरी, वडा नम्बर ३ के वडा अध्यक्ष सन्तराम चौधरी, प्रमुख प्रशासकीय अधिकृत विरबहादुर ऐर, साल्टट्रेडिङ कर्पोरेशन रामचन्द्र जोशी, कृषि सामाग्री कम्पनी लिमिटेडके रमेश भटटराई, डिलर लेहुइयया सहकारी संस्थाके अध्यक्ष तथा प्रतिनिधि, पशु शाखा प्रमुख सुर्य प्रसाद चौधरीलगायत सहभागिता रहे ।

कार्यक्रममे सहजीककरण कृषि शाखा प्रमुख मैयाकुमारी चौधरी ओ सामाजिक विकास शाखा प्रमुख यगम कलेल करल रहिट । ओस्टेक डिलर लेहुइया सहकारी संस्थाके अध्यक्ष तथा प्रतिनिधिहुक्रे किसानके आवश्यकता अनुसार मल कम आइल ओरसे कोटा बह्रैना आग्रह करल रहिट ।