कैलालीमे सयौं घरधुरी डुबानमे

पहुरा समाचारदता
धनगढी, २३ सावन । गैल रात बरसल पानीसे कैलालीके सयौं घरधुरी डुबानमे परल बा ।

सोम्मारके रातसे बरस पानीपपाछे बाढ आके कैलारी गाउँपालिका वडा नम्बर ७ छुटकी बसन्ता, वडका बसन्ता, भुइयाफाँटा क्षेत्रके १४९ घरधुरी डुबानमे परल बा । कटैनी लडियामे आइल बाढसे वडा नम्बर बस्ती डुबानमे परलपाछे गाउँपालिकाके अध्यक्ष राजसमझ चौधरी, प्रमुख प्रशासकीय अधिकृत विरबहादुर ऐर, वडा नम्बर ७ वडा अध्यक्ष दिपेन्द्रबहादुर बम, नेपाल रेडक्रस सोसाइटी कैलालीके स्ट्रोन परियोजनाके कैलारी गाउँपालिका संयोजक तारणीदत्त पाण्डेय, सुरक्षा निकाय, भल्मन्सालगायतसे बाढ प्रभावित घरधुरीके अनुगमन कैगिल बा ।

ओस्टेक करके जोशीपुर गाउँपालिका वडा नं. ३ भितरियाके १८० घरधुरी प्रभावित हुइल ओ तीन घरधुरी विस्थापित हुइल बटै । स्थानीयवासी मैनादेवी साउँद लगायत अन्य २ घर परिवार पूर्ण रुपसे विस्थापित हुइल वडा अध्यक्ष रेणु कुमारी डंगौरा बटैली । मैनादेवी अब्बे अपन आफन्तके घरमे पशुचौपाया तथा खाद्यन्न सारके बैठल बटी । अति विपन्न परिवारके साउँद खैना, बैठना तथा पिना पानीके समेत बहुट समस्या रहल बटैलै ।

बाढ आइल पत्ता पाइलपाछे वडा अध्यक्ष डंगौरा लगायत विपद् व्यवस्थापन समितिके टोली राहत सामाग्री सहित प्रत्येक्ष फिल्डमे पुगल रहिट । ९ घरपरिवार उच्च जोखिममे परल बा । जेकर घरमे चुल्हा बरना अवस्था नइहो ओइनहे राहत समेत वितरण कैगिल वडा अध्यक्ष बटैली ।

भजनी नगरपालिकाके वडा २ मे १५ घर, वडा नं. ३ मे ५ घर, वडा नं. ८ मे १ घर, वडा नं. ५ मे ६५ घर ओ वडा न. ७ मे १५० घरधुरी बाढसे प्रभावित हुइल बटै । भजनीमे बाढसे प्रभावितहुुकनहे कैलाली क्षेत्र नम्बर ३ प्रतिनिधि सभा सदस्यमे निर्वाचित सांसद गंगाराम चौधरी, भजनी नगरपालिकाके नगर प्रमुख केवल चौधरी, वडा अध्यक्ष नगरपालिकाके प्रवक्ता विक्रम चौधरीलगायत जनप्रतिनिधि मंगरके रोज अपनही खटके दिनभर उद्धार कार्यमे खटल रहिट ।

जिल्ला प्रशासन कार्यालय कैलालीके सूचना अधिकारी शिवराज जोशी मंगरके रोज कैलालीमे सयौं घरधुरीमे पानी पैठके प्रभावित हुइल बटैलै । बाढमे फसलहुकनहे सुरक्षित स्थानमे सारगिलफे सुचना अधिकारी जोशी बटैलै ।

ओस्टेक करके मोहना लडियामे आइल बाढसे कैलाली जिल्लासंग जोरल नेपाल–भारतके एक ठो सीमा स्तम्भ पुहल बा । प्रशासन कार्यालय कैलालीके सूचना अधिकारी शिवराज जोशीसे डेहल जानकारी अनुसार धनगढी उपमहानगरपालिका ९ स्थित भैंसीघाटमे रहल नेपाल ओरके ७४८÷३ नम्बरके सीमा स्तम्भ पुहल बा ।

ओस्टे कैलाली जिल्ला कैलारी गाउँपालिका वडा नम्बर ७ भुइयाफाँटा ओ भारतओर जिल्ला लखिमपुर खिरी गोलभुजीस्थित नेपाल–भारत सीमाक पुरान सहायक स्तम्भ नम्बर ७२६÷२ उप्पर मोहना लडिया बहल बा । सीमा पिल्लर डुब्ना मेरिक बाढ आइलपाछ सशस्त्र प्रहरी बल नेपाल नम्बर ३४ गण हेक्वाके विओपि भुईयाफाँटासे सप्रबह केशवराज जोशीके कमाण्डम ७ जानेक टोली खटके सीमा स्तम्भ चेकजाँच लाग गैल रह । बाढ अभिन नइघटल कारण उ सिमा स्टम्भ रहल नइरहल पाछ पत्ता लग्ना सूचना अधिकारी जोशी बटैलै ।

अविरल वर्षासे कैलालीके जानकी गाउँपालिका वडा नम्बर ४ के बाढ प्रभावितहुकनहे सुख्खा खाना वितरण करल बा ।

तत्काल खाना पकैना अवस्था नइरहल ५५ बाढ प्रभावित परिवारहे तत्काल जानकी गाउँपालिकासे वडघरहुकनके सक्रियतामे सुख्खा खाना वितरण करल हो । ओस्टेक वडा नम्बर ४ के गिरधरपुर, ३४ घरधुरी, मुनुवा बजारमे १५ घरधुरी, टावर टोलमे ५ घरधुरी अति प्रभावित रहल बटै ।