कैलारीसे निशुल्क रगतके व्यवस्था

आर्थिक वर्ष २०७९÷०८० मे विमारीहुक्रे ३०३ पिन्ट रगत लेलैं

पहुरा समाचारदाता
हसुलिया, २४ सावन । कैलाली जिल्लास्थित कैलारी गाउँपालिकासे एक बरसमे विमारीहुकनके ३ सय ३ पिन्ट रगत उपलब्ध करैले बा ।

कैलारी गाउँपालिकासे आर्थिक बर्ष २०७९÷०८० के लाग नेपाल रेडक्रस सोसाइटी जिल्ला शाखा (रक्तसंचार केन्द्र धनगढी)विच हुइल सहमति अनुसार विरामीहुकनके निशुल्क रगत उपलब्ध करागिल हो ।

कैलारी गाउँपालिका थारु बाहुल क्षेत्र रहल ओ थारु समुदायमे ढेर डेखा परल सिकलसेल एनिमियाके विमारीहुकनहे बारम्बार रगत आवश्यक रहल ओरसे निशुल्क रगत उपलब्ध कराइल गाउँपालिका अध्यक्ष राजसमझ चौधरी बटैलै ।
आर्थिक अवस्था कम्जोर रहल विमारी आवश्यक परल निशुल्क रगत उपलब्ध हुइलेसे कुछ राहत होए कना उद्देश्यसे गाउँपालिकासे निशुल्क रगत उपलब्ध करैना व्यवस्था मिलाइल उहाँ बटैलै ।

कैलारीके एक जाने विमारी एक बरसमे ४८ पिन्ट रगत सेवा लेले बटैं, गाउँपालिका अध्यक्ष कहलै, सिकलसेल एनिमियाके समस्या रहल विमारीहे बारम्बार रगत चहाई परठ । निशुल्क रुपमे रगत पैलेसे बाँचल पैसासे औषधी खरिद करसेक्ही ।
गाउँपालिकासे यी बरसफे निशुल्क रगत डेना कहिके नेपाल रेडक्रस सोसााइटीसे सम्झौता हुइल गाउँपालिका अध्यक्ष बटैलै ।

निशुल्क रगत वा रक्ततत्व लेहल सेवाग्राहीके कैलारी गाउँपालिकाके स्थायी रहल खुल्न कागजात (जस्टे जन्मदर्ता, नागरिकता, मतदाता परिचयपत्र, बसाई सराई, पालिका वा वडाके सिफारिसपत्र मध्ये कौनोके प्रतिलिपि आवश्यक पर्ना कहल बा ।
आपतकालिन अवस्थामे रगत लेहे पर्ना हुके आवश्यक कागजात पेश करे नइसेक्ना हुइलेसे व्यक्तिसे नगद भुक्तानी करके लेहे सेक्ना बा, कलेसे गाउँपालिकाके सिफारिस वा कागजात प्राप्त हुइलेसे भुक्तानी रकम स्वयम व्यक्तिहे फिर्ता कैना वा विलके आधारमे सोेझे गाउँपालिकासे भुक्तानी कैना व्यवस्था मिलैना कहल बा । यी कार्वाही रगत लेहल ३५ दिनभिटर करे पर्ना कहल बा ।