लागू औषधसहित चार जाने पक्राउ

पहुरा समाचारदाता
धनगढी, २५ सावन । कैलाली जिल्लाके टमान ठाउँसे लागु औषध ओसारपसार ओ सलग्न रहल चार जाने पक्राउ परल बटै ।

प्रहरी चौकी त्रिनगर कैलालीसे खटल प्रहरी टोली धनगढी उप–महानगरपालिका–३ त्रिनगर ब्यारेल लग्गेसे १६ ट्यावलेट अबैध लागु औषध स्पाससहित एक जनहनहे पक्राउ करले बा । शंका लाग चेकजाँच करेबेर गोदावरी न.पा. २ बैठना वर्ष १९ के गणेश पार्कीहे बुधके साँझ प्रहरी लागु औषधसहिट फेला पारके पक्राउ करल हो ।

ओस्टेक ईलाका प्रहरी कार्यालय बहुलिया कैलालीसे खटल प्रहरी टोली धनगढी उप–महानगरपालिका–१४ खुटियाघाटसे ४ किलो ३० ग्राम लागु औषध (चरेश) सहित प्युठानके लुङ गाउँपालिका ७ बैठना ४२ बर्षीय मिना बुढाथोकी ओ रुकुम पश्चिम बासिकोट गाउँपालिका ७ बैठना ३९ बर्षीय भिमसेन खत्रीहे चरेस सहित नियन्त्रणमे लेले बा । शंका लागके चेकजाँच करेबेर भिमसेन खत्रीके झोलामे लुकाई छिपाई धारल अवस्थामे उ लागु औषध (चरेश) फेला पारके दुनहुन पक्राउ करल रहे ।
उ सम्बन्धमे थप अनुसन्धानके लाग जिल्ला प्रहरी कार्यालय कैलाली नानल जिल्ला प्रहरी कार्यालय कैलालीके प्रवक्ता कुलदिप चन्द जानकारी डेलै ।

ओस्टेक करके कैलालीके गोदावरी न.पा. ४ बुढीतोलासे १३ ग्राम लागु औषध खैरो हेरोईन जैसिन विल्गैना धुलो पदार्थ ओ नगद रकम रू ५३ हजारसहित जिल्ला डोटी, जोरायल गा.पा. २ बैठना बर्ष २८ के मिन बहादुर मालीहे बुधके साँझ प्रहरी पक्राउ करले बा । विशेष सूचनाके आधारमे ईलाका प्रहरी कार्यालय मालाखेती कैलालीसे खटल प्रहरी टोली शंका लागके चेकजाँच करेबेर ओइन थेनसे उ पदार्थ फेला पारके पक्राउ करल हो ।