१० दिनमे ७७ जाने नयाँ संक्रमित ठप्लै

पहुरा समाचारदाता
धनगढी, २५ सावन । सुदूरपश्चिम प्रदेशमे सन २०२३ के जुलाईसम चार सय चार जाने डेंगु संक्रमित पुगल बटै ।

सुदूरपश्चिम प्रदेश सामाजिक विकास मन्त्रालय स्वास्थ्य निर्देशनालय डोटीसे डेहल जानकारी अनुसार प्रदेशके नौ जिल्लामे जुलाईसम ४ सय ४ जाने डेंगु संक्रमित हुइल बटै । निर्देशनके अनुससार जुलाई महिनाके १० टरेक सम प्रदेशके नौ जिल्लामे ७७ जाने लौैव संक्रमित ठपल बटै । जेम्ने सबसे ढेरसे ढेर कैलालीमे २२ जाने थपल बटै । ओस्टेक अछाममे १७, कञ्चनपुरमे १६, बाजुरामे १० जाने, डोटीमे ६ जाने, बझाङ डडेल्धुरामे ३÷३ जाने, दार्चुलामे १ जाने ओ बैतडीमे यी महिना अभिन संक्रमण मुक्त रहल बा ।

निर्देशनलायके अनुसार प्रदेशके सबसे संक्रमित जिल्लामे दार्चुला रहल मने १० दिनके तथ्यांक हेरबेर एक जाने केल लौवा संक्रमित डेखल बटै । यी जिल्लामे मार्च महिना सबसे ढेर ११७ जनहनमे संक्रमण डेखल रहे । अब्बे संक्रमणदर घटटी गैल बा । कञ्चनपुरमे अभिनसम ७७, कैलाली, अछाममे ४८÷४८ संक्रमित पुगल बटै ।

बाजुरा १४, डोटी ११, बझाङ ९ ओ बैतड, डडेल्धुरा ५÷५ जनहनमे संक्रमण डेखल निर्देशनालय जनैले बा । गैल महिनामे तुल्नामे डेंगु संक्रमण बृद्धि हुइटी गैल बा ।

डेंगू मच्छरके कटाईसे सर्ना रोग हो । यी रोग एडिस एजिप्टाई जातके पोथी मच्छरके कटाईसे सर्ना रोग हो । यी मच्छर ग्रामीण क्षेत्रके तुलनामे शहरी क्षेत्रमे ज्यादा पैठै । पानी जम्ना ठाउँमे टीनके डब्बा, रंगके खाली डब्बा, थोत्रो टायर, अलकत्रा वा मट्टितेलके खाली ड्रम, फुलदानी, गमला, पानीके ट्ंयाकी आदिमे यी अण्डा पारठ । सहरी क्षेत्रमे यैसिन वस्तु पर्याप्तमात्रामे रहल ओरसेफे यी मच्छर सहरमे ढेर हुइना करठ ।

डेंगू एडिस एजेप्टाई ओ एडिस एल्वौपेक्टस नामक मच्छरके कटाईसे हुइना तीव्र भाइरल संक्रमण हो । यी भाइरस डेंगु १, डेंगु २, डेंगु ३ ओ डेंगु ४ करके चार मेरिक रहठै । एडिज मच्छर करिया रंगके रहठै, जेम्ने उज्जर थोप्लाफे विल्गाइठ । यी मच्छर विशेष करके दुपहर कटना करठै । औलो उत्पन्न कैना मच्छर फोहर पानीमे पैना हुइलेसेफे डेंगू सर्र्ना मच्छर टमान दिनसे हलचल नइहुइल स्वच्छ पानीमे अण्डा परठै ।

डेंगू रोग क्लासिक डेंगू, हेमोरेजिक ओ साक सिन्ड्रोम करके तीन मेरिक रहठै । क्लासिक डेंगू सामान्य प्रकारके डेंगू हो । यी अपनही निको हुइठ, मृत्युके सम्भावना कम रहठ । मने यदि कौनो व्यक्तिहे डेंगू हेमोरेजिक ज्वरो वा डेंगू साक सिन्ड्रोम हुइल बा कलेसे यकर उचित मेरिक उपचार नइकरलेसे मृत्यु हुई सेकठ ।

जुरी घटैना सिटामोल खाई परठ ओ प्रशस्त झोल पदार्थ खाई परठ । मने जुरी घटैना कहिके एस्पीरीन तथा आईबुप्रोफेन भर खाई नइपरठ । डेंगू जुरी विरुद्धके खोप तथा खास उपचार समेत नइहरल ओरसे मच्छरके कटार्ईसे बच्न यी रोगके बचावटके मुख्य उपाय हो ।