भजनीके विस्थापित सडकमे बास

कृषि मन्त्री चौधरीसे बाढसे प्रभावित ओ विस्थापित क्षेत्रके अनुगमन

पहुरा समाचारदाता
धनगढी, २५ सावन । लगातर तीन दिनके अविरल बर्षासे भजनी नगरपालिका वडा न. ३ ओ ८ मे एक हजारसे घरधुरी विस्थापित हुइल बटै । अविरल बर्षासे भजनी नगरपालिका वडा न. ३ पकरियापुर, वडा न. ८ खैरा, गौडचौरा, बन्दिया, सोनाफाँटास्थित वाढसे विस्थापित ओ प्रभावित हुइल बटै ।

भजनी नगरपालिकाके प्रवक्ता विक्रम चौधरी वडा नम्बर ३ ओ ८ से केल एक हजारसे ढेर घरपरिवार पूर्ण रुपसे विस्थापित हुइल बटैलै । घरेम पानी पैठके अभिनसम जाई नइसेक्ना अवस्था रहल उहाँ बटैलै ।

अभिनसम घरभिटर पानी पैठल अवस्था बा, हम्रे जनप्रतिनिधिफे तीन दिनसे उद्धारमे खटल बटी, प्रवक्ता कहलै, ‘घर खेतुवा पुरा जलमग्न अवस्था रहल बा । घर अभिन डुबल बा । खेतुवा हेरेबेर समुन्दरहस बा ।

बाढसे विस्थापितहुक्रे अब्बे हुलाकी रोड, विद्यालय, सुरक्षित भवन ओ आ–अपन नातपाटनके घर बैठल विस्थापितहुकनहे राहतके व्यवस्था हुइटी रहल उहाँ बटैलै । उहाँ कहलै, ‘बाढसे विस्थापित ओ प्रभावितहुकनके लाग राहत जुटटी रहल बा । नगरपालिकाके विपद व्यवस्थापन समितिके बैठकसेफे राहतके व्यवस्था कैना निर्णय हुइल प्रवक्ता चौधरी बटैलै ।

भजनीसंग्गे कैलारी गाउँपालिका वडा नम्बर ७ के मे डेढ सय सय प्रभावित हुइल बटै कलेसे २६ घरपरिवार विस्थापित हुइल गाउँपालिका अध्यक्ष राजसमझ चौधरी बटैलै । उहाँ कहलै, विस्थापित हुकनहे सुरक्षित ठाउँमे बैठना कहले बटी । गाउँपालिकासे राहत डेना निर्णय हुइल बा । जेकर घरेम चुल्हा बरना अवस्था नइहो कलेसे राहत डेजाई ।

ओस्टेक करके विफेक रोज सुदूरपश्चिम प्रदेश सरकारके भुमि व्यवस्था तथा कृषि सहकारी मन्त्री रामेश्वर चौधरी आज बाढीसे विस्थापितहुँक्रनके स्थलगत अनुगमन करले बटै ।

लगातर तीन दिनके अविरल बर्षासे भजनी नगरपालिका वडा न. ३ पकरियापुर, वडा न. ८ खैरा, गौडचौरा, बन्दिया, सोनाफाँटास्थित वाढसे विस्थापित ओ प्रभावितहुकनके मन्त्री चौधरी स्थलगत अनुगमन करल रहिट । अनुगमन क्रममे बाढसे विस्थापितहुकनके लाग तत्कालके लाग प्रदेश सरकारसे राहतके व्यवस्था कैना उहाँ बटैलै ।

बाढ ओ डुबानके समस्या बह्रटी गैलपाछे कैलाली जिल्लामे निर्माण हुइल पूर्व–पश्चिम हुलाकी राजमार्ग स्थानीयवासीके सुरक्षित वासस्थान बने पुगल बा । डुबानके जोखिमसे बाँच्न स्थानीयवासी यी राजमार्ग छेउमे त्रिपालके टहरा बनाके बैठना बाध्य हुइल बटै । “वर्षा हुइटीकी स्थानीयवासी त्रासमे बैठना करल बटै, स्थानीय शिवलाल चौधरी कहलै, “लडियाके बहाव बस्तीमे पैठलपाछे स्थानीयवासी राजमार्गहे अपन सेल्टर बनाइल हुइट ।”

ओस्टेक वर्षासंगे गैल पहिरोसे धनगढी–डडेलधुरा (भीमदत्त) राजमार्गमे यातायात आवागमन अवरुद्ध बा । पहिरोसे राजमार्ग अवरुद्ध हुके सुदूरपश्चिमके सात पहाडी जिल्ला आवागमन कैना यात्रु ओ मालवाहक यातायातके साधनबीच डगरमे रोकल बा । यी राजमार्गके बूढीतोला खानीडाँडा सडकखण्ड ढसल बा ।