कैलारीके बसौटीमे विद्युत महशुल काउण्टर संचालन

विद्युत महशुलके लाग धनगढी जाई पर्ना झंझटसे मुक्त

पहुरा समाचारदाता
हसुलिया, २६ सावन । कैलारी गाउँपालिकाके वडा नम्बर २ बसौटीके हसुलिया नो लाइट सव स्टेशनमे विद्युत महशुल काउण्टर संचालनमे आइल बा ।

कैलारी गाउँपालिका लगायत धनगढी उपमहानगरपालिकाके वडा नम्बर १४, १८ ओ १९ के सेवाग्राहीहे मध्यनजर करटी बसौेटीमे पहिल चो विद्युत महशुल काउण्टर संचालनमे आइल हो । विद्युत महशुल काउण्टरके उदघाटन शुकके रोज कैलारी गाउँपालिकाके अध्यक्ष राजसमझ चौधरी एक कार्यक्रमके विच करल रहिट ।

महशुल काउण्टरके उदघाटन करटी उहाँ कैलारीबासीन आब ३०।४० रुप्या महशुल बुझाईक लाग धनगढी जाई पर्ना झन्झटसे मुक्ती पाइल बटैलै । उहाँ कहलै, गाउँघरमे बहुुट जैसिन महिनामे न्यूनतम महशुल चार्ज ३०।४० केल रुप्या आइठ । ओइने एक महिनामे आइल ३० रुप्या विद्युत महशुल बुझाई धनगढी जाईबेर साढे चार सय रुप्यासम तिरे पर्ना बाध्यता रहे । आब अपने गाउँठाउँमे महशुल काउण्टर स्थापना हुइल बा । महशुल बुझाई आब धनगढी जाई नइपरी ।

विद्युतके महशुल आजकाल्ह इसेवासेफे बुझाई सेक्ना व्यवस्था हुइल बा, गाउँपालिका अध्यक्ष कहलै, मने सेवाग्राही विश्वास नइकरल कारण विद्युत कार्यालय पुग्ना करठै । विद्युत महशुल इसेवासेफे बुझाई सेक्जाइठ । उहाँ भर्खर संचालनमे आइल विद्युत महशुल काउण्टरमे विल बुझाके पहिल सेवाग्र्राही बन्लै ।

ओस्टेक कैलारी गाउँपालिका वडा नम्बर ४ के वडा अध्यक्ष ठागुराम चौधरीफे महशुल बुझाके दुसर सेवाग्राही बनल बटै ।
नेपाल विद्युत प्राधिकरण धनगढी वितरण केन्द्रके प्रमुख सूर्यनारायण मण्डल कैलारी गाउँपालिकाके वडा नम्बर २ बसौटीके हसुलिया नो लाइट सव स्टेशनमे विद्युत महशुल काउण्टर संचालनमे आइलपाछे १२ हजार सेवाग्राही अपने गाउँठाउँमे महशुल तिर्ना सुविधा पाइल बटैलै । उहाँ कहलै, हसुलिया नो लाइट सव स्टेशनसे कैलारी गाउँपालिकाबासी, ओ धनगढी उपमहानगरपालिकाके वडा नम्बर १४, १८ ओ १९ के सेवाग्राही लाभ लेटी रहल बटै ।

बसौटीके हसुलिया नो लाइट सव स्टेशनमे संचालन आइल विद्युत महशुल काउण्टर महिनाके १३ ओ २७ गते करके दुई संचालनमे अइना वितरण केन्द्र्र प्रमुख मण्डल बटैलै । उहाँ कहलै, बसौटीके हसुलिया नो लाइट सव स्टेशनमे सेवा लेहुइयाके संख्या ढेर बा, मने बहुट जाने इसेवासे विल तिरठै, कोई कोई धनगढीमे जाके विल तिरठै । हम्रे यहाँ महिनाके दुई दिन विद्युत मशसुल बुझैना काण्डटर खुल्ला रना कहले बटी मने सेवाग्राहीके संख्या बह्रलेसे महिनामे आउर दिन थप करे सेक्जाई ।

कैलारी गाउँपालिकाके वडा नम्बर २ बसौटीके हसुलिया नो लाइट सव स्टेशनमे संचालन हुइल विद्युत महशुल काउण्टर उदघाटन कार्यक्रममे कैलारी गाउँपालिका वडा नम्बर २ के वडा अध्यक्ष विकास चौधरी, ३ के वडा अध्यक्ष सन्तराम चौधरी, ४ के वडा अध्यक्ष ठागुराम चौधरी, वडा नम्बर ६ के वडा अध्यक्ष प्रेम बहादुर चौधरी, वडा नम्बर ८ के वडा अध्यक्ष तारामल कठरिया, नेपाल विद्युत प्राधिकरण धनगढी वितरण केन्द्रके लेखा प्रमुख विनोद ढकाल, हसुलिया फुलवारी नो लाइट सव स्टेशनके इन्चार्ज चक्र खडका लगायत कर्मचारीहुकनके उपस्थिति रहल रहे ।