पालिका स्तरीय बालअधिकार समितिके बैठक निम्जल

पहुरा समाचारदाता
हसुलिया, २६ सावन । कैलारी गाउँपालिका स्तरीय बालअधिकार समितिके बैठक शुकके रोज हसुलियाममे निम्जल बा ।

पालिका स्तरीय बालअधिकार समितिके संयोेजक तथा कैलारी गाउँपालिकाके उपाध्यक्ष भगवतीकुमारी चौधरीके अध्यक्षतामे हुइल कार्यक्रमके विशिष्ट पहुना गाउँपालिका अध्यक्ष राजसमझ चौधरी रहल रहिट । कार्यक्रममे बालअधिकार टमान विषयमे छलफल करटी पाँच ठो निर्णय कैगिल बा ।

बैठकसे गाउँपालिका स्तरीय बालअधिकार समितिहे पुर्णता डेना, वडा स्तरीय बाल क्लव गठन, सक्रिय नइरहल बाल क्लवहे सक्रिया बनैटी पुनगर्ठन, गाउँपालिका स्तरीया बाल कोष स्थापना, पालिका स्तरीय बाल अधिकार संजाल गठन कैना, बालबाालिकाके क्षेत्रमे काम करेबेर एकद्धार प्रणालीसे जैना निर्णय हुइल बा ।

पालिका स्तरीय बालअधिकार समितिके संयोजक भगवतीकुमारी चौधरी बालअधिकारके क्षेत्रमे विविध गतिविधि संचालन करटी आइल बटैली । बाल कल्याण संघ टीकापुर, वल्र्डभिजन इन्टरनेशनल नेपालके सहयोगमे कैलारी गाउँपालिकामे बालबालिकाहुकनके लाग जीवन उपयोगी रूपान्तरण कक्षा संचालनसे बालबालिकाके जीवनमे सुधार नन्ना सफल हुइल बटैली । उहाँ कहली जौन ठाउँमे जीवन उपयोगी रूपान्तरण कक्षा संचालन हुइल बा, उहाँक बालबालिका सुधर्ना मौका पाइल बटै ।

गाउँपालिका अध्यक्ष राजसमझ चौधरी बाल कल्याण संघ टीकापुर, वल्र्डभिजन इन्टरनेशनल नेपालहे पालिकाके सक्कु वडा कार्यक्रम संचालन कैना आग्रह करलै । उहाँ कहलै, बाल कल्याण संघ टीकापुरसे बालबालिकाके क्षेत्रमे कैगिल कार्यक्रम मजा बा, अब्बे वडा नम्बर ८ मे संचालन रहल बा । मने वडाके क्षेत्रहे समेटल नइहो । सेक्ले पालिकाके सक्कु वडा समेटी नइटे ८ नम्बरके सक्कु क्षेत्रहे समेटके लैगिलेसेफे मजा हुई ।

कार्यक्रममे बाल कल्याण संघ टीकापुरके फिल्ड अधिकृत परशुराम चौधरी कार्यक्रmमके उद्देश्यबारे जानकारी डेहल रहिट ओस्टेक करके बाल कल्याण संघ टीकापुरके परियोजना अधिकृत किसन कसारा कैलारी गाउँपालिकामे कैगिल बालअधिकारके क्षेत्रमे गतिविधिके समिक्षा करल रहिट । ओस्टेक कैलारी गाउँपालिकाके सामाजिक विकास शाखा प्रमुख यगम कलेल सहजीकरण करल रहिट ।

कार्यक्रममे कैलारी गाउँपालिका स्तरीय बालअधिकार समितिके सदस्य तथा प्र्रमुख प्रशासकीय अधिकृत विरबहादुर ऐर, समितिके सदस्य सदस्य तथा शिक्षा शाख प्र्रमुख गणेश प्रसाद मिश्र, समिति सदस्य अनिता चौधरी, सिन्धु चौधरी, अंकित चौधरीके सहभागिता रहे ।

ओस्टेक करके बैठकके आमन्त्रित पहुना कैलारी गाउँपालिका वडा नम्बर २ के अध्यक्ष विकास चौधरी, ३ के अध्यक्ष सन्तराम चौधरी, ४ के अध्यक्ष ठागुराम चौधरी, वडा नम्बर ५ के अध्यक्ष विष्णु प्रसाद चौधरी, वडा नम्बर ६ के अध्यक्ष प्रेमबहादुर चौधरी, वडा नम्बर ८ के अध्यक्ष तारामल कठरिया, इलाका प्रहरी कार्यालयके भक्तराज जोशीलगायतकेफे सहभागिता रहे ।