फोनिज दिवसमे महुवाके टेलुवा लगागिल
पहुरा समाचारदाता
धनगढी, २८ सावन । नेपाल आदिवासी जनजाति पत्रकार महासंघ (फोनिज) के २४औं स्थापना दिवसके अवसरमे महुवाके टेलुवा लगागिल बा ।
फोनिज कैलाली, कञ्चनपुर ओ प्रदेश जिल्ला कार्य समितिके संयुक्त आयोजनामे शनिच्चरके कैलालीके गौरीगंगा नगरपालिका १० नुक्लिपुरस्थित लक्ष्मी सामुदायिक वनमे वृक्षारोपण करल हो ।
दिवसके अवसरमे ‘आदिवासी जनजाति सवाल ओ हमार भूमिका’विषयक अन्तरक्रियाफे करल बा । कार्यक्रमके वडका पहुना फोनिज सुदूरपश्चिम अध्यक्ष लखन चौधरी महुवाके पर्यावरणीय महत्व केल नइहुके आदिवासी जनजातिके संस्कृति, संस्कार ओ पहिचानसंग जोरल ओरसे संरक्षणमे जोड डेलै ।
फोनिज स्थापनाके बारेमे जानकारी डेटी अध्यक्ष चौधरी कहलै– ‘प्रेस स्वतन्त्रके रक्षा तथा पत्रकार हकहितके लाग नेपाल पत्रकार महासंघके स्थापना हो । मने पत्रकार महासंघसे विशिष्टिकृत रुपमे उत्पीडित वर्ग समुदाय, राज्यके मूल प्रवाहमे आइ नइसेकल समुदायके पत्रकारके उत्थान तथा उ समुदायके आर्थिक, सामाजिक, राजनीतिक, साांस्कृतिकलगायत सवालके उठान हुई नइसेक्के फोनिजके स्थापना हुइल हो ।’
बिट पत्रकारिता जस्टे सम्बन्धित समुदायसे आइल पत्रकारसे केल सम्बन्धित समुदायके अन्तरवस्तु बारेके ज्ञान हुइना हुइल ओरसे उ समुदायके सवाल तथा मुद्दाबारे गहन रुपमे उठान करे सेक्ना हुइल ओरसे जनजाति पत्रकार जनजातिके सवालमे केन्द्रित हुई पर्ना उहाँक कहाई बा ।
फोनिजके सुदूरपश्चिम महासचिव उन्नती चौधरी राज्यके विभेदकारी नीतिके कारण जनजाति समुदायके पत्रकार तथा पत्रकारसे सञ्चालन करल मिडियाहे टिकैना गाह्रो रहल बटैली ।
फोनिज कैलालीके अध्यक्ष राम दहितके अध्यक्षतामे हुइल कार्यक्रममे स्वागत मन्तव्य थारु पत्रकार संघ कैलालीके अध्यक्ष दिनेश दहित करलै ।
