दिपेन्द्र माविसे एनसीसीमे छनौट हुइल विद्यार्थीन प्रवचन
पहुरा समाचारदाता
हसुलिया, १ भदौ । कैलाली जिल्लाके कैलारी गाउँपालिकास्थित श्री दिपेन्द्र मावि हसुलियासे नेपाली सेनाके विद्यालयमे राष्ट्रिय सेवा दल (एनसीसी) सिनियरमे छनौट हुइल विद्यार्थीनहे शुकके रोज पहिल प्रवचन डेगिल बा ।
कैलालीमे राष्ट्रिय सेवा दल (एनसीसी) सिनियरमे पाँच विद्यालय छनौट हुइल बा । जेम्ने दिपेन्द्र माविसे छनौट हुइल ३६ जाने विद्यार्थीनहे पहिल प्रवचन डेगिल हो ।
कैलारी गाउँपालिका वडा नम्बर ५ के वडा अध्यक्ष विष्णुप्रसाद चौधरीके वडका पहुनामे हुइल कार्यक्रममे उहाँ राष्ट्रिय सेवा दल (एनसीसी) सिनियर यी पालिकमे परल ओरसे सक्कुहुनके विकास कैनामे सहयोग बटैलै । कैलारी गाउँपालिका विपदके उच्च जोखिममे रहल ओरसे विपद न्यूनिकरणमेफे उहाँहुकनके भारी योगदान रहना बटैलै ।
कार्यक्रममे सहभागि नइहुइसेक्लेसेफे कैलारी गाउँपालिका अध्यक्ष राजसमझ चौधरी कैलारीके दिपेन्द्र माविमे राष्ट्रिय सेवा दल (एनसीसी) सिनियर पर्ना खुशीके बाट रहल सन्देश पठैले बटै ।
कार्यक्रमके विशिष्ट पहुना राप्रपा नेपालके जिल्ला अध्यक्ष होमबहादुर गुरुङ यी कार्यक्रममे विद्यार्थीनमे अनुशासन, व्यक्तित्व विकास ओ राष्ट्र निर्माणमे सहयोग पुग्ना आशा व्यक्त करलै ।
एनसीसीसे राष्ट्रिय एकता, सामाजिक एकता, आपसमे सदभाव, आपतविपदमे सहयोग, काल्हके दिनमे उहाँहुकनके सेना ओ प्रहरीमे जागिरके अवसरमे सहयोग पुग्न विद्यालयके प्रअ विनोद भट्टराई बटैलै ।
छनौट हुइल विद्यार्थीनहे नृत्य, संगित, खेलकुद ओ हल्का फायरिङके तालिम डेजाई । यी कार्यक्रममे एक बरसमे विद्यालयमे ७९ दिन ओ २१ दिन नवलपुरमे नवलपरासीमे कार्यक्रम हुइनाफे प्रअ भट्टराई बटैलै ।
नेपाली सेनाके मेजर विक्रम चौधरी एनसीसी कार्यक्रमके उद्देश्य ओ संचालन प्रक्रियाबारे जानकारी डेहल रहिट । ओस्टेक उहाँ एनसीसीमे छनौट हुइल कक्षा ११ ओ १२ के १८ छात्रा, १८ छात्र करके ३६ जनहनहे प्रवचनफे डेहल रहिट ।
विद्यालय व्यवस्थापन समितिके अध्यक्ष विरप्रसाद चौधरीके अध्यक्षतामे हुइल कार्यक्रममे संचालन शिक्षक प्रेमराज पन्त ओ स्वागत मन्तव्य विद्यालयके प्रअ विनोद भट्टराई करल रहिट ।
कार्यक्रममे सशस्त्र प्रहरीके प्रहरी नायव उपरिक्षक नरेशकुमार खडका ओ इलाका प्रहरी कार्यालय हसुलियाके प्रमुख प्रहरी नायव निरिक्षक राजेन्द्रप्रसाद कार्की, विद्यालयके शिक्षक, अभिभावक, विद्यालय व्यवस्थापन समितिके सदस्यहुकनके सहभागिता रहल रहे ।
