प्रदेश ओ स्थानीय सरकारसे गुरही विदाके माग

पहुरा समाचारदाता
धनगढी, २ भदौ । थारू समुदायके सवालमे काम कैना संघ सस्थासे सुदूरपश्चिम प्रदेश ओ स्थानीय सरकारसे गुरही टिहुवारके सार्वजनिक विदाके माग करले बटै ।

शनिच्चरके रोज उ संघसंस्थासे संयुक्त प्रेस विज्ञप्ती जारी करटी भदौ ४ गते गुरही विदा माग करल हो । थारू कल्याणकारिणी सभा कैलाली, सखी सञ्जाल कैलाली, थारू लेखक संघ, राष्ट्रिय थारू कलाकार मञ्च, थारू नागरिक समाज, थारू विद्यार्थी समाजसे प्रदेश सरकार ओ स्थानीय सरकारके कार्यतालिकामे गुरहीके विदा नइडेहल डेखल ओरसे उ दिन तत्काल विदा घोषणा करेक लाग प्रेस विज्ञप्ती मार्फत अपिल कैगिल बा ।

गुरही थाारू समुदायसे परापूर्वकालसे मनैटी आइल पर्व हो यी पर्व हरेक वर्ष नेपाली पात्रो अनुसार नागपञ्चमीके दिन मनाजाइठ । धनगढी वरपर बसोबास करटी आइल थारूहुक्रे वि.स. २०६७ से धनगढीके गुरही चोकमे संस्थागत रूपमे भव्यताके साथ मनैटी आइल बटै ।

संघीयतासहितके गणतन्त्रात्मक नयाँ नेपालके संविधानमे सक्कु जातजाती तथा समुदाय तथा यहाँ बसोबास कैना सक्कु नेपालीहुकनहे समान ठानठ । यिहे अनुरूप थारू बाहुल्य पालिकामे गुरहीके दिन स्थानीय विदा डेना निर्णय टमान पालिकामे करल पाजाइठ । गुरहीके रौनकता अब्बे गाउँसे शहरसम छाइल बा ।

यी पर्वमे विशेष करके थारू समुदायके बालबालिका रमैना हुइल ओरसे ओ नयाँ पुस्ताहे संस्कृति हस्तान्तरण करे पर्ना आवश्यकता समेत हुइल ओरसे गुरहीके दिन स्थानीय बिदाके लाग हम्रे ज्ञापनपत्र प्रेस विज्ञप्ती मार्फत विदाके लाग माग दर्ज करटी रहेबेरफे गुरहीके दिन विदा नइडेहे थारू समुदायहे उपेक्षा करल महसुस हुइल बा । अटरा प्रयास करेबेरफे थारू समुदायके पर्वके लाग डेना विदा सरकारके कार्यतालिकामे नइपर्ना ओ प्रत्येक वर्ष हम्रे ज्ञापनपत्र बुझाई पर्ना स्थितीसे गम्भीर ध्यानाकर्षण हुइल विज्ञप्तीमे कहल बा ।

थारू समुदायके पर्व गुरहीलगायतके पर्वमे सुदुरपश्चिम सरकार ओ स्थानीय सरकारसे गुरहीके विदा कार्यतालिकामे उल्लेख हुइके आई पर्ना जोरदार माग कैगिल बा ।

थारू समुदायके सवालमे काम कैना सक्कु संघ सस्थाके संयुक्त आयोजनामे विगतके वर्षमे यिहे २०८० भदौ ४ गतेके दिन धनगढी उपमहानगरपालिका वडा नं. ८ गुरही चोकमे गुरही असरैना कार्यक्रमके सक्कु तयारी हुइलफे कहल बा ।

यी वर्षके गुरही असरैना कार्यक्रम २०८० मे थारू मौलिक परम्परा अनुसार गुरही मनैनाके साथे विविध थारू सांस्कृतिक कार्यक्रम हुइना ओ गुरही चोकमे गुरहीके मुर्तीके शिलन्यासफे करजैटी बा । यी गुरही असरैना कार्यक्रम २०८० मे सहभागी हुके कार्यक्रमके शोभा बढा डेहक लाग सक्कुहुनसे आग्रहफे कैगिल बा ।