कानूनहे टेक्के आघे बह्रना उपप्रमुख रानासे आग्रह
पहुरा समाचारदाता
धनगढी, ५ भदौं । कानूनी पहिचान (नागरिकता ओ जन्मदर्र्ता) सम्बन्धमे धनगढी उपमहानगरपालिकाके जनप्रतिनिधि ओ कर्मचारीसंग अन्तरक्रियात्मक छलफल कार्यक्रम सम्पन्न हुइल बा ।
महिला कानून र विकास मञ्चके आयोजनामे धनगढी उपमहानगरपालिकाके संयोजनमे कानूनी पहिचान (नागरिकता ओ जन्मदर्र्ता) सम्बन्धमे धनगढी उपमहानगरपालिकाके जनप्रतिनिधि ओ कर्मचारीसंग अन्तरक्रियात्मक छलफल कार्यक्रम कैगिल हो । धनगढी उपमहानगरपालिकाके नगर उपप्रमख कन्दकला रानाके अध्यक्षतामे हुइल कार्यक्रममे उहाँ नागरिकता ओ जन्मदर्ता सम्बन्धी कार्य व्यवहरिकता ओर जाईबेर फँसे सेक्ना बटैलै ।
उहाँ कहलै, हम्रे काम करेबेर अलिअलि व्यवहारिकता मने कानूनहे टेक्के सहजुल का बा ओहोर ओर लाग परठ । अपने पारर्दिर्श तरिकासे गैलेसे मजा हुइना उहाँ बटैलै । विवाह दर्ताफे करेबेर ढेर समस्या आइल बा । केक्रो दुई गोसिनिया रहल बेला पहिले छोटकीके विवाह दर्ताकरेबेर बरकीके विवाह दर्ता करेबेर समस्या आइल बटैली ।
कार्यक्रममे महिला कानून र विकास मञ्चके अधिवक्ता विनोद देवकोटा नागरिकता ओ जन्मदर्ताके सम्बन्धमे सैद्धान्तिक रुपमे एकरुपता हुइलेसेफे व्यवहारिक रुपमे कठिनाई हुइल बटैलै । हरेक व्यक्तिके जन्मदर्ता कराई पैना अधिकार बा, मने नागरिकता सक्कु पाई नइसेक्ना अवस्था रहे सेकठ उ जनप्रतिनिधिके सिफारिससे हुइना बाट बटैलै ।
महिला कानून र विकास मञ्चके कार्यकारी निर्देशक तथा अधिवक्ता सविन श्रेष्ठ कानूनी पहिचानके अधिकारके विषयमे रहल वर्तमान कानूनी व्यवस्था, स्थानीय जनप्रतिनिधि तथा कर्मचारीहे प्राप्त कानूनी अधिकार, नयाँ अध्यावधिक व्यवस्थाबारे आम नागरिकहे जानकारी कराई पर्ना बटैलै ।
कार्यक्रमके संचालन तथा सहजीकरण अधिवक्ता रेणुप्रधान श्रेष्ठ करल रहिट । कार्यक्रममे धनगढी उपमहानगरपालिकाके १९ वडाके वडा अध्यक्ष, धनगढी उपमहानगरपालिकाके टमान शाखाके प्रमुख, कर्मचारी ओ वडा सचिवहुक्रे कानूनी पहिचान(नागरिकता ओ जन्मदर्र्ता) सम्बन्धमे आ आपन बाट राखल रहिट ।
