धनगढी उपमहानगरके आर्थिक वर्ष २०७९/०८० सालके सार्वजनिक सुनुवाई
पहुरा समाचारदाता
धनगढी, ७ भदौ । धनगढी उपमहानगरपालिकाके आर्थिक वर्ष २०७९/०८० सालके सार्वजनिक सुनुवाई बुधके रोज एक कार्यक्रमके सम्पन्न हुइल बा ।
धनगढी उपमहानगरपालिकाके नगर प्रमुख गोपाल हमालके अध्यक्षतामे हुइल कार्यक्रममे नगर उपप्रमुख कन्दकला राना, प्रमुख प्रशासकीय अधिकृत रामलाल श्रेष्ठ, १ से १९ वडाके अध्यक्ष, कार्यपालिका सदस्य, उपशाखा प्रमुख, कर्मचारी ओ सर्वसाधारणके सहभागिता रहे । सार्वजनिक सुनुवाई कार्यक्रममे पहिल चरणमे स्थानीय जयराज जोशी, पत्रकार गगन ऐडी, सरस्वती सिंह, लोकेन्द्र जोशी ओ सरस्वती जोशी उपमहानगरपालिकासे रोडमे धारल बालु उठाइल, धनगढीमे प्लाष्टिक ठैली विस्थापित करके अब्बे डेना ठैली बल्गर नइरहल, महिलाके लाग सीपमुलक तालिम कटौटी करल, धनगढीमे ठप समृद्धि बनाइ पर्ना, माटी जाँच करेपर्ना, कृषि अनुदानके बाट, लघु उद्यमी बनाई पर्ना बाट गुनासो ओ सुझाव राखल रहिट ।
ओस्टेक करके राजेश खाती भुमि आयोगके लाल पुर्जा वितरणके काम कहा पुगल कना प्रश्ना, डगरेक रहल सुखल रुखुवा काहे नइकाटल प्रश्न करल रहिट । उहाँ देवहरिया पटेला सडक निर्माण कहे हुई नइसेकल, धनगढीमे रिक्साके व्यवस्थापन ओ लागु औषधके बाट राखल रहिट ।
विद्यार्थी तथा उसुके राष्ट्रिय खेलाडी दिपक चौधरी खेलाडीके लाग बजेट विनियोजना न्यून रहल बटैलै । संगिना जाग्री फोहोर व्यवस्थापनके नाउँमे रकम असुली करल, देवहरिया सामुदायिक बनमे रहल गौशाला व्यवस्था नइहुइल, रविन्द्र प्रसाद जोशी शिवगंगा लडियासे बालु निकर्ना मने लडिया कटानी रोके नइसेकल बाट राखल रहिट ।
सार्वजनिक सुनुवाई कार्यक्रममे नगर प्रमुख गोपाल हमाल उपमहानगरपालिकासे कृषिमे जोड डेहल मने अब्बे प्लाटिङ हुके कृषि योग्य जमिन ओराई लागल बटैलै । कृषिसे रोजगारी सृजना करल उहाँ बटैलै । धनगढीसे प्लाष्टिक ठैली बन्द करल अब्बे नेपाल सरकारसे उ कदम आघे बह्राइल उहाँ बटैलै । प्लाष्टिक जरैलेसे क्यान्सर जन्य रोग लग्ना करल, लाल विषादीसेफे क्यान्सर हुइना उहाँ बटैलै । धनगढी उपमहानगरपालिकासे संचालन करल हरियाली कार्यक्रममे ३८ लाख रुप्या स्वस्च्छासे उठल ओ विदेशमे बैठुइया धनगढी हरियाली कार्यक्रममे जागरुकता डेखाइल बटैलै ।
धनगढी उपमहानगरपालिकाके नगर उपप्रमुख कन्दकला राना महिला डिडीनके लाग दुना टपरी, सीपमुलक तालिम ओ उत्पादन हुइल बस्तुके बजारीकरण कैना काममे सहयोग करल बटैली । उपमहानगरपालिकासे वडा स्वास्थ्य क्लिनिक संचालनसे ४० हजारसे ढेर जाने सेवा लेहल उहाँ बटैली । सुत्केरी महिलाके लाग नि:शुल्क एम्बुलेन्स सेवा, भारी योजनाके प्रदेश स्तरीय अनुगमन ओ छोट योजनाके वडा स्तरीस्य अनुगमन करटी गुणस्तर नाँप जाँच करके योजना पास करके भुक्तानी डेहल बटैली ।
ओस्टेक करके प्रमुख प्रशासकीय अधिकृत रामलाल श्रेष्ठ, डिई दिजराज भट्ट, सामाजिक विकास शाखा प्रमुख टंक विष्ट, शिक्षा महाशाखा प्रमुख नरेन्द्र खातीलगायत विषयगत महाशाखाके प्रमुखसे जिज्ञाशा ओ प्रश्नके जवाफ डेहल रहिट । धनगढी उपमहानगरपालिकाके आयोजना तथा नेपाल पत्रकार महासंघ कैलालीके संयोजनमे हुइल कार्यक्रमके सहजीकरण वरिष्ठ पत्रकार मनमोहन स्वाँर करल रहिट ।
