टीकापुर विद्रोह दिवस मनागिल

पहिचान स्थापित नइहुइटसम सघर्ष जारीः थारु अगुवा
पहुरा समाचारदाता
धनगढी, ७ भदौ । कैलालीके टीकापुरमे आज टीकापुर विद्रोह दिवस मनागिल बा ।
देशके संरचना परिवर्तन हुई थारु समुदायसे अपन हक अधिकारके लाग राजनीतिक आन्दोलनके क्रममे कैलालीके टीकापुरमे २०७२ साल भदौ ७ गते घटना घटल रहे ।
थारु कल्याणकारिणी सभा व थरुहट थारुवान राष्ट्रिय मोर्चा कैलालीके संयूक्त आयोजनामे मनागिल कार्यक्रमके वडका पहुना पूर्व प्रतिनिधिसभा सदस्य माननीय रेशमलाल चौधरी रहल रहिट । कार्यक्रममे सम्बोधन करटी उहाँ थारु हुइकल कारण जेलमे दारल बटैलै । अपने छुटेबेर प्रधानमन्त्रीसे बाट करटी बाँकी जेल बन्दी कब छुटही कना बाटमे और जनहनहे संविधान दिवसके अवसरमे छुटैना आश्वान डेहल बटैलै । उहाँ अपने जिट्टी रहटसम पहिचानके मुद्दा नइविस्रैना बटैलै । थारु समुदाय विच अन्तरक्रिया कार्यक्रम आवश्यक रहल बटैलै । टीकापुर घटना हुईबेर अपने गुलारिया रहल ओ प्रशासनके मनैन संग्गे रहल बटैलै । मने साढे पाँच बरस जेल जीवन विताई परल बटैलै । अभिन ४ जाने जेल जीवन विटैटी रहल ओ २९ जनहन उप्पर झुठा मुद्दा लगाके फरार सुचीमे धारल बटैलै ।

कार्यक्रमके विशिष्ट पहुना पूर्वमन्त्री रामजनम चौधरी अपने भुमि सुधार मन्त्री रहलबेर मुक्तकमैयाके लाग ढेर काम करल बटैलै । उहाँ कहलै, हमार भिटर एक दुसरहे गारी कैना प्रविधि बा । गारी करके गैलेसे कुछ नइमिली सक्कु जाने मिल्के जैना बा । साझा मुद्दामे साझा बोली बनाके जाई पर्ना आवश्यक बा । थरुहट थारुवान प्रदेश नइमिलटसम यी दिवसहे निरन्तरता डेनाफे उहाँ बटैलै । लाल आयोग सार्वजनिक करे नइसेक्ना दुःखके बाट रहलफे पूर्वमन्त्री बटैलै । टीकापुर विद्रोह दिवसफे एक ठो आन्दोलन रहल बटैलै ।
प्रदेशसभा सदस्य लक्ष्मण किशोर चौधरी थारु समुदायहे हत्याराके विल्ला भिराइल बटैलै । टीकापुर आन्दोलनमे घुसपैठ हुके घटना घटाइल व अब्बे सर्वसाधारण निर्दोष थारु जेल जीवन विटैटी रहल बटैलै ।

कार्यक्रममे पूर्व माननीय कृष्णकुमार चौधरी, थाकस केन्द्रीय सदस्य प्रभातकुमार चौधरी, रामचरण चौधरी, थारु नेता होरीलाल चौधरीलगायत थारु अगुवा मन्तव्य व्यक्त करल रहिट । थारु कल्याणकारिणी सभा कैलालीके कार्यवाहक सभापति माधव चौधरीके अध्यक्षतामे कार्यक्रम हुइल हो । कार्यक्रमके संचालन देशराज चौधरी करल रहिट ।
ओस्टेक आन्दोलनके क्रममे उहे ज्यान गुमाइल नबालक सहिद टेकबहादुर साउदके शालिक स्थापना करके उदघाटन कैगिल बा । साउदके शालिक उदघाटन संघके भूमि व्यवस्था तथा कृषि मन्त्री रञ्जिता श्रेष्ठ चौधरी करल रहिट ।
