गौरा पर्वके अवसरमे हिल वल्र्डमे वक्तृत्व प्रतियोगिता
पहुरा समाचारदाता
धनगढी, ८ भदौ । कैलालीके धनगढी उपमहानगरपालिका वडा नम्बर १ मे रहल हिल वल्र्ड इंगलिस बोर्डिङ स्कूलमे विद्यालय स्तरीय वक्तृत्व प्रतियोगिता सम्पन्न हुइल बा ।
विद्यालयसे विद्यार्थीहुकनके बोल्ना क्षमताके विकास कैना उद्देश्यसे गौरा पर्वके उपलक्ष्यमे विद्यार्थी जीवनमे अनुशासनके महत्व विषयमे विद्यालय स्तरीय प्रतियोगिता कार्यक्रम करल विद्यालयके शिक्षक भरत कटुवाल बटैलै । उ प्रतियोगितामे कक्षा ९ के विद्यार्थी लोकेन्द्र पनेरु पहिल हुइल बटै ।
ओस्टेक दुसरामे कक्षा १० के विद्यार्थी लोकश बोगटी, टिसरामे कक्षा ९ के स्नेश ठगुन्ना ओ चौठामे कक्षा ८ के तृप्ती शर्मा हुइल उ विद्यालयके शिक्षक कटुवाल बटैलै ।
विद्यालय स्तरीय वक्तृत्व प्रतियोगिताके विजेताहुकन विद्यालयके प्रअ डि आर शर्मा, शिक्षक भक्त परियार, शिक्षिका मेनुका शर्मा, जय लक्ष्मी जोशी लगायतके उपस्थितिमे पुरस्कार वितरण कैगिल बा । विजेता विद्यार्थीनहे पुरस्कारमे शैक्षिक सामाग्री डेगिल रहे ।
