भूमिगत पानीके मुहान सुख्ना चिन्ता

पहुरा समाचारदाता
धनगढी, ९ भदौ । जथभावि आटिजन बोरिड गारके पानीके व्यवस्थापन नइकैना, पानीके रिचार्ज क्षेत्र बनाइ नइसेकलपाछे भूमिगत पानीके मुहान सतहसे तरे जैटी रहल कहटी चिन्ता व्यक्त कैगिल बा ।

शुकके रोज धनगढी उपमहानगरपालिकाके आयोजनामे भूमिगत पानी रिचार्ज सम्बन्धी जनप्रतिनिधि, कर्मचारी ओ सरोकारवाला निकायविच कैगिल अन्तरक्रिया तथा छलफल कार्यक्रममे उ चिन्ता व्यक्त कैगिल हो ।

धनगढी उपमहानगरपालिकाके नगर उपप्रमुख कन्दकला रानाके अध्यक्षतामे हुइल कार्यक्रममे उहाँ भूमिगत जलस्रोतके मुहानहे बचाईक लाग उप्परसे बरसना पानीके रिचार्ज कैना आवश्यक रहल बटैली । उहाँ कहली, धनगढी उपमहानगरपालिका टमान ठाउँमे पानी रिचार्जके लाग पानी पोखरी बनैना सुरुवाट कैसेकल बा । यम्ने नगरबासीसेफे आ–अपन जग्गामे पानी रिचार्ज कैटी बोटविरुवा लगैना आवश्यक रहल बटैली । पानीके मुहान सुख्टी गैलेसे नल्का, बोरिङमे पानी आइ छोरना उहाँ बटैली । अब्बे पानीके मुहान सुख्टी जाके गर्मी महिनामे नल्का ओ बोरिङमे कम पानी आइठ । भविष्यमे पानीके मुहान सुखी कलेसे गहिराईमे नल्का गारकेफे पानी निकारे नइसेक्ना अवस्था अइना नगर उप प्रमुख राना बटैली ।

धनगढी उपमहानगरपालिका वडा नम्बर ३ वडा अध्यक्ष राजबहादुर ऐर आबसे बोरिङ गारके जथाभावि पानी निकारके ओस्टे छोरे नइपैना कहटी कार्यपालिकासे निर्णय करल बटैलै । उहाँ कहलै, भूमिगत जलस्रोतके संरक्षणके लाग नगरपालिकासे पानीहे रिचार्ज कैना अभियानहे तिब्र बनाइल बा ।’

पानी रिचार्जके लाग धनगढी उपमहानगरपालिकास्थित सामुदायिक वनमे पोखरी निर्माणके लाग पालिकासे गैल बरस बजेट विनियोजन करल मने पोखरी नइबनाइलपाछे उ रकम फिर्ता गैल वडा अध्यक्ष ऐर बटैलै ।

उहाँ कहलै, ‘पानी रिचार्ज कैना पोखरी निर्माणके लाग पालिकासे १ करोडसे ढेर रुप्या बजेट विनियोजन करल रहे । मने पोखरी निर्माण हुई नइसेकलपाछे रकम फिर्ता गैल । सामुदायिक वनमे रहल ताल टलैया पानी रिचार्जके मजा स्रोत हो मने पाटपटिङगरसे भठटी गैल कारण उहीहे साफसुफ कैनाफे आवश्यक बा ।’

शिवनगर खानेपानी उपभोक्ता समितिके अध्यक्ष राजेश खाती शिवनगर खानेपानी आयोजनाके बोरिङमे पहिलेक तुल्नामे पानी कम आइ लागल बटैलै । उहाँ कहलै, पहिले बहुट पानी आए अब्बे पानीके मात्र घटल बा । धनगढी उपमहानगरपालिकासे जोरल छिमेकी पालिका आटिजन बोरिङ गारके पानी ओस्टे छोरल बा । पानीके सदुपयोग करल नइहो । जिहीसे उप्परके सतहसे पानीमे मुहान सुख्टी जाई कलेसे यहाँफे पानी आई छोरी ।’

कार्यक्रममे टियूके भुगर्भ शास्त्र भूमिगत जलस्रोत विज्ञ डा. मोतिलाल रिजाल भूमिगत जलस्रोतके अवस्था, भूगिगत जलस्रोतके संरक्षणबारे कार्यक्रम प्रस्तुत करल रहिट ।

कार्यक्रममे धनगढी उपमहानगरपालिकाके नगर प्रमुख गोपाल हमाल, प्रमुख प्रशासकीय अधिकृत रामलाल श्रेष्ठ, गौरीगंगा नगरपालिकाके नगर प्रमुख देवीदत्त कँडेल, धनगढी उपमहानगरपालिकाके वडा अध्यक्ष, कार्यपालिका सदस्य, टमान शाखाके प्रमुखहुकनके सहभागिता रहे ।