स्वस्तिक अस्पतालके लापारवाहीसे विमारीके ज्यान गैल
प्रहरी मुद्दा करे नइमानल, आफन्त आन्दोलित
पहुरा समाचारदाता
धनगढी, ११ भदौ । कैलालीके धनगढीस्थित स्वस्तिक कार्डियो एण्ड मल्टिस्पेसियालिटी हस्पिटलमे मिर्गौलाके पत्थरीके अप्रेसनपाछे विरामीके मृत्यु हुइल बा ।
कञ्चनपुरके बेलौरी नगरपालिका–१० शिवनगरके ५५ वर्षीय ऐजनलाल चौधरीके पत्थरीके अप्रेशनके क्रममे मृर्गौला निकारलपाछे ज्यान गैल हो । उ अस्पतालके जर्नल सर्जन डा. जोनस तिवारी अप्रशेन विगारपाछे विमारीके ज्यान गैल मृतकके छावा बृद्धिराम चौधरी आरोप लगैले बटै ।
चौधरीके अस्पतालसे सुरुमे दुरविन विधिसे शल्यक्रिया करके बाँया मिर्गौलामे जमल ११ एमएम ओ ९ एमएमके दुई ठो पत्थरी निकारल रहे । उहे क्रममे अत्याधिक रक्तश्राव हुके उहाँक पेट फुलल रहे । पहिल अप्रेशन हुइल दुई घण्टापाछे विमारीके अवस्था कर्रा हुइलपाछे अस्पतालके जर्नल सर्जन डा. तिवारी विमारीहे बचाइक लाग परिवारहे मिर्गौला निकरलेसे बाँच्न कहल रहे, मृतकके छाई सुस्मा बटैली ।
मृगौला निकारलपाछे अस्पतालके कहल अनुसार रातभर रगत खोज्ली, सुस्मा कहली, ‘विहानसम २३ पिन्ट रगत ल्यानल रही । मने विहान ८ बजे विमारीमे शरिरमे जम्ना दुई पिन्ट रगत रहल डाक्टर कहल रहे । नेपाल रेडक्रसके ब्लड बैंकमे रगत ओराइलपाछे अँटवारफे दिनभर मनै खोजफे रगतके जोहो कैगिल रहे ।
मृतकके छाई सुस्मा कहली, डाक्टर अपनही कहल अप्रेशनके क्रममे मेसिनले नसा कटगिल स्वीकारल बटैली । घरसे अपन बाबा नेग्टी डवाई कराई आइल अब्बे डाक्टरके लापारवाहीके मृत्युके खबर सुनलपाछे बहुट पिडा हुइल बा । लापरवाही करुइया डाक्टरके जैसिकफे कार्वाही हुइना चाही ।
अस्पतालके सञ्चालक महेश जोशी पत्थरीके शल्यक्रिया कैना क्रममे रक्तश्राव नइरोकलपाछे डाक्टरसे मिर्गौला निकारल बटैलै । मृर्गौला निकारलपाछे रक्तश्राव नइरोकल ओ विमारीके अवस्था सुधार नइहुइल कहटी भेन्टीलेटरमे धारके उपचार करेबेरफे बचाई नइसेकल जोशी बटैलै ।
डाक्टरके लापारवाही अपन बाबा ज्यान गैल कहटी बृद्धिराम चौधरी जिल्ला प्रहरी कार्यालयमे डाक्टरहे कार्वाही ओ छानविनके माग करटी उजुरी देहे गैल मने प्रहरीसे उजुरी दर्ता नइकैडेहल बटैलै । पीडित परिवारसे अस्पताल आघे दोषीहे कार्वाहीके माग करटी आन्दोलनमे उटरके नारा जुलुश करटी बटै कलेसे उ ठाउँमे प्रहरी तैनाथ कैगिल बा ।
