मृतकके आफन्त ओ अस्पतालबीच तीन बुँदे सहमति

पहुरा समाचारदाता
धनगढी, ११ भदौ । पत्थरीके समस्यासे उपचाररत बिरामीके मृत्युपाछे विवादमे तानल धनगढीस्थित स्वस्तिक अस्पताल ओ मृतकके आफन्तबीच तीन बुँदे सहमति हुइल बा ।

अस्पतालमे उपचाररत बिरामीके मृत्यु हुइलपाछे सोम्मार दुपहर उ अस्पतालमे तनाव हुइल रहे । मृतकके आफन्त राजकुमार चौधरीके अनुसार सहमतिमे मृतकके एमबीबीएस अध्ययनरत छावा ज्योतिप्रकाश चौधरीके पढाई खर्च व्याहोर्ना, २ छाईनके भोज खर्च व्यहोर्ना ओ उपचारमे लापरवाही कैना डाक्टर जोनस तिवारीहे कारबाही कैना सहमति हुइल बा ।

कैलालीके धनगढीस्थित स्वस्तिक कार्डियो एण्ड मल्टिस्पेसियालिटी हस्पिटलमे जर्नल सर्जन डा. जोनस तिवारीसे कञ्चनपुरके बेलौरी नगरपालिका–१० शिवनगरके ५५ वर्षीय ऐजनलाल चौधरीके मृगौलामे रहल पत्थरीके अप्रशेन विगारलपाछे विमारीके ज्यान गैल रहे ।