टिनाके टेलुवा विक्रीसे एक सिजनमे डेढ कटठामे डेढ लाख आम्दानी
पहुरा समाचारदाता
हसुलिया, १५ भदौ । कैलारी गाउँपालिका वडा नम्बर ४ के गाउँ चौधरी खल्ला टोलके जगलाल डगौंरा १६ बरससे व्यावसायिक रुपमे टिनाके टेलुवा उत्पादन करके विक्री करटी आइल बटै ।
मुक्तकमैया परिवारके जगलाल चौधरी एक सिजनमे टिनाके टेलुवा विक्री कैके डेढ कटठा जग्गामे डेढ लाखसे ढेर रुप्या आम्दानी कैना सफल हुइटी आइल बटै । कैलालीके टमान ठाउँमे पहिले ढेर बरस रुखुवाके नर्सरी उत्पादन कैना कामपाछे उहाँ १६ बरससे टिनाके टेलुवा (नर्सरी) उत्पादन करटी आइल बटैठै ।
पहिले रुखुवक टेलुवा बनाउ लगातार १३ बरस उ काम कैनु, उ छोरके अब्बे व्यावसायिक रुपमे टिनाके टेलुवा उत्पादन करठु,’ जगलाल कहलै, ‘एक बरसमे तीन चो उत्पादन हुइना बेर्नामे अब्बे नामधारी मिर्चा, फुलगोभी, बन्दगोभी, टमाटर, भन्टालगायतके टिनाके टेलुवा विक्री सुरु हुइल बा । खास कैके मोर टिनाके टेलुवा उत्पादन कैना उद्देश्य हो, डेढ कटठा जग्गामे यी खेती करल ओरसे ठोरठार टिनाफे लगैठु, टमाटर अब्बे फुला फुल्के फारा लागे लागल बा । साग, खिरा, मुरै तयार हुइल बा । और टिनाफे लगासेकल बटु ।’
उहाँ कहलै, ‘पहिल सिजनके लाग बेर्ना तयारहुके विक्री हुइटी बा । दुसरा फेरा अगहन महिनामे टिनाके टेलुवा छिटना सुरु करठु कलेसे टिसरा फागुन महिनामे टिनाके वियार (टेलुवा) छिटठु ।’
प्रतिसिजनमे एकसे डेढ लाखसम रुप्या टेलुवा विक्रीसे आम्दानी हुजाइठ,’ जगलाल कहठै, ‘टेलुवा उत्पादनसंग्गे टिना खेतीफे लगाके विक्री करटी आइल बटु । उहे आम्दानीसे घर खर्च चलैना, दुख विमारमे पैसा काम लागल बा ।’
कम जग्गामे टिनाके टेलुवा विक्री करके मजा आम्दानी कैना सफल हुइल उहाँक पहिले बनुवाके नर्सरी उत्पादनके कैना कामके लाग बहुट माग रहे ।
जगलाल चौधरी कहठै, ‘रुखुवाके नर्सरीके उत्पादनके लाग मोर बोलौवा खोब होए । उ काम २०६० सालसे सुरु करल रहु । फुलवारीमे २ बर्ष, बसन्तामे ४ बरस, स्याउले बजारमे ३ बर्ष, गेटा २ बर्ष ओ सहजपुर, खानीडाँडामेफे नर्सरी उत्पादनके काम करनु ।
उहाँ कहलै, ‘रुखुवाके नर्सरी (टेलुवा) उत्पादनके काम पहिले–पहिले तलबमे करु, पाछे ठेक्कामे उत्पादन करे लग्नु । मजा आम्दानी हुजाए, घरेफे खेती लगैना हुइल ओरसे नइभियाइ लागलपाछे उ काम छोरके घरेक खेतीसँगे टिनाके टेलुवा उत्पादन सुरु करे लग्नु ।
मुक्तकमैया परिवारके जगलाल चौधरीके पहिले साविक गदरिया गाविस वडा नम्बर ८ सेमरहना (हाल कैलारी गाउँपालिका वडा नम्बर ९) मे ९ बरस कमैया जीवन विटाइल बटैठै ।
उहाँ कहलै, ‘मोर बाबा जलमसे कमैया रहे, मोर डाई बुक्रही रहिट । हम्रे पुरा सन्खाने कमैया लागल रही । मोरफे बाल्यकाल उहे सेमरहनामे विटल, मैफे उहे मालिकाके घर ९ बरस कमैया लग्नु, मोर भोजकाज उहे घर कमैटी कमैटी हुइल रहे । पाछे मोर गोसिनीयफे बुक्रही/कमलरी लग्ली ।’
२०४२ सालमे कैलारी गाउँपालिका वडा नम्बर ४ (साविक हसुलिया गाविस) ‘के गाउँमे) आइल उहाँक बाबाक नाउँमे १० कटठा नम्बरी जग्गा रहल बाटिन ।
कैलारी गाउँपालिका वडा नम्बर ४ के गाउँ चौधरी खल्ला टोलके जगलाल केल नाही १२ जाने महिलाफे व्यावसयिक रुपमे टिना उत्पादनमे लागल बटै ।
सहयोगी कृषक समुहके अध्यक्ष जानकी चौधरी सहास नेपालसे गठन करल उ समुहमे २६ जानेक सदस्य सक्रिया रहल मन्से १२ जाने व्यावसायिक टिना खेती सुरुवाट कैगिल बटैठी । सहास नेपालसे समुहहे १२ ठो थोपा सिचाईसहितके टनेल, ३५ थान क्रेट, जैविका विगादी बनाइक लाग करिया ड्रम २६, पानी मोटर २ थो, एक ठो खानेपानी नल्का सहयोग उहाँ बटैली । टिना विक्रीके पैसासे घर खर्च चलैना, लर्कनके लिखैना पह्रनामे सहज हुइल अध्यक्ष बटैठी ।
खल्ला टोलहे टिना व्लक क्षेत्रमे रुपमे आघे बह्रैना योजना रहल बटैटी राशयानिक विषादी हटैटी जैविक विषादीके बनैना सुरुवाट करल, गाउँघरमे रहल बालविवाह मुक्त टोल, अपन परम्परा संस्कृति जोगैना अभियानमे लागल अध्यक्ष जानकी बटैठी । उहाँ यी बरस लोप हुइल कठघोरी नाँच सुरुवाट करल बटैली ।
कैलारी गाउँपालिकाके उपाध्यक्ष भगवतीकुमारी चौधरी पालिकासे वडा वडामे टमान व्लक बनैना योजना आघे बह्राइल कहटी यहाँ टिनाके उत्पादन मजा हुइलेसे टिना बनैटी संकलन केन्द्रके लाग सोच बनैना बटैली ।
