श्रद्धाञ्जली सभा कार्यक्रम
पहुरा समाचारदाता
हसुलिया, १५ भदौ । कैलारी गाउँपालिका वडा नम्बर ८ के वडा सदस्य स्वर्गिय माघुराम चौधरीके १३औं दिनमे पुण्यतिथिमे शुकके रोज श्रद्धाञ्ली सभा कार्यक्रम कैगिल बा ।
कैलारी गाउँपालिका वडा नम्बर ८ के वडा अध्यक्ष तारामल कठरियाके अध्यक्षतामे हुइल कार्यक्रममे वडका पहुना नेपाली काँग्रेस कैलालीके उपसभापति खेमराज डगौैरा ओ विशिष्ट पहुना कैलारी गाउँपालिका उपाध्यक्ष भगवतीकुमारी चौधरी रहल रहिट ।
कार्यक्रमके वडका पहुना खेमराज डगौैरा स्वर्गिय माघुराम चौधरी पार्टी केल नाही गाउँसमाजके लाग असल व्यक्ति रहल चर्चा करलै । कार्यक्रमके विशिष्ट पहुना गाउँपालिका उपाध्यक्ष भगवतीकुमारी चौधरी कोई नइसोचल, कल्पना नइकरल घटना घटल बटैली । उहाँ कैलारी गाउँपालिका कुशल व्यक्ति गुमाइल कहटी पालिकाफे क्षति पुगल बटैली । गाउँपालिकासे उहाँक परिवारहे सेक्ना सहयोग हुइटी रनाफे उहाँ प्रतिवद्धता जनैली ।
कार्यक्रममे नेपाली काँग्रेस क्षेत्र नम्बर ३ के क्षेत्रीय सभापति रिता चौधरी, महाधिवेशन प्रतिनिधि रामचरण चौधरी, कैलारी गाउँपालिका वडा नम्बर ५ के वडा अध्यक्ष विष्णु प्रसाद चौधरी, वडा नम्बर ४ के वडा सदस्य मोहनलाल चौधरीलगायतसे स्वर्गिय वडा सदस्य माघुराम चौधरीके पुगाइल योगदानके चर्चा करल रहिट ।
वडा नम्बर ८ के वडा अध्यक्ष तारामल कठरिया कुशल व्यक्ति गुमाइल कहटी वडा कार्यालयहेफे क्षति पुगल बटैलै । स्वर्गिय माघुराम चौधरी वडाके विकास ओ जनताके हितमे सदैव तत्पर हुके काम उहाँ बटैलै ।
कार्यक्रमके संचालन वडा नम्बर के कृषि प्राविधि हेमराज ढुङगाना करल रहिट । कार्यक्रममे कैलारी गाउँपालिकाके १ से ९ समके वडा अध्यक्षहुक्रे, कार्यपालिका सदस्य, वडा सदस्य, नेपाली काँग्रेसके प्रतिनिधिहुक्रे, तरुणदल, पालिकाके कर्मचारीलगायत टमान व्यक्तित्वके सहभागिता रहल रहे । स्वर्गिय वडा सदस्य माघुराम चौधरीके ३७ बरषके उमेरमे उच्च रक्तचापके कारण ज्यान गैल हो ।
