डेउडा प्रतियोगितामे बाजुरेली सेवा समूह पहिल
पहुरा समाचारदाता
धनगढी, १६ भदौ । धनगढीमे सञ्चालित सुदुरपश्चिम गौरा महोत्सव तथा डेउडा प्रतियोगितामे बाजुरेली सेवा समूह पहिल हुइल बा ।
सुदुरपश्चिम प्रज्ञा प्रतिष्ठान ओ डेउडा प्रतिष्ठानके संयुक्त आयोजनामे हुइल प्रतियोगतामे पहिल हुइल बाजुरेली सेवा समूहहे नगद २१ हजार, दुसरा हुइल बझाङी महिला समूहहे नगद १५ हजार ओ टिसरा हुइल कल्पना खड्का समूहहे नगद ९ हजारके साथे प्रमाणपत्र प्रदान करल बा ।
प्रतियोगिता समापन कार्यक्रमके वडका पहुना सुदुरपश्चिम सरकारके निवर्तमान भौतिक पुर्वाधार मन्त्री दीर्घ सोराडी रहल रहिट । भदौ १४ गतेसे धनगढी उपमहानगरपालिकाके प्राङगणमे सञ्चालन हुइल प्रतियोगितामे २२ टोलीके सहभागिता रहल रहे । भाषा, साहित्य,कला र संस्कृतिको संरक्षण गर्नु हाम्रो दायित्व हो । कना मुल नाराके साथ २०७३ सालसे निरन्तर करटी आइल डेउडा प्रतियोगिता २०८० मे आठौं चो संचालन करल सुदूरपश्चिम डेउडा प्रतिष्ठानके महासचिव तोयाप्रसाद भट्ट बटैलै ।
सहभागी सक्कु टिमहेफे प्रमाणपत्र प्रदान करल बा ओस्टे टमान समयमे डेउडा प्रतिष्ठान ओ समग्र डेउडा क्षेत्रमे योगदान पुगैना व्यक्तित्वहेफे सम्मान, प्रसंसा, अभिनन्दन प्रमाणपत्र प्रदान करल डेउडा प्रतिष्ठानके कोषाध्यक्ष प्रेम चन्द बटैलै । सुदुरपश्चिम गौरा महोत्सव तथा डेउडा प्रतियोगिता समापन समारोह डेउडा प्रतिष्ठानके अध्यक्ष दलबहादुर बोगटीके अध्यक्षतामे हुइल रहे ।
