अपरिचित शव ओ हेराइल व्यक्तिके विवरण धारल वेवसाइट उदघाटन

पहुरा समाचारदाता
काठमाडौं, १७ भदौ । प्रहरी महानिरीक्षक बसन्त बहादुर कुँवर ‘पहिचान नइखुलल शव ओ हेराइल व्यक्तिहुकनके विवरण’ राखल वेवसाइट udb.nepalpolice.gov.np के अँटवार नेपाल प्रहरी प्रधान कार्यालयमे आयोजित एक कार्यक्रमबीच उदघाटन कैगिल बा ।

उदघाटन पश्चात कार्यक्रमहे सम्बोधन करटी प्रहरी महानिरीक्षक कुँवर निर्माण हुइल वेवसाइटके सुरक्षाके साथसाथे नागरिक एपमे जोरे सेक्लेसे आउर प्रभावकारी हुइना बटैलै । वेवसाइटहे कौनोफे समस्या नइअइना करके प्रभावकारी रूपमे संचालन करटी ढेरसे ढेर सरोकारवाला व्यक्तिके पहुँचमे पुगाके पहिचान नइखुलल शव तथा हेराइल व्यक्ति सनाखत कैना सहज ओ सक्षम हुइना विश्वास उहाँ व्यक्त करलै ।

नागरिकस्तर ओ यिहीसे सम्बन्धित सरोकारवाला पक्षके सहयोग लेटी प्रारम्भिक रूपमे शवके सनाखत हुइना वातारण सिर्जना कैना ओ ओसिन मेरिके विवरण संकलन करके वेवसाइटमे रख्ना विषयमे सम्बन्धित विभागसे नियमित रूपमे अनुगमन करे पर्ना बटैलै ।

कार्यक्रममे वेवपेज निर्माण कैना कम्पनी योङनमाइन्ड्स क्रियसन प्रालिके प्रबन्ध निर्देशक डा.श्रीधर मरासैनी वेवसाइटके प्रयोगके प्रभावकारिता ओ विशेषताके बारेमे जानकारी डेलै ।

दुर्घटना, प्राकृतिक विपद् वा अन्य कारणसे मृत्यु हुके पहिचान हुई नइसेकल वा हकवाला वा आफन्तसे फेला पारे नइसेक्के वेवारिसे शवके उचित रूपमे व्यवस्थापन कैना उद्देश्यसे ओसिन शवके विस्तृत विवरणसहित हाली वेवपेज निर्माण कैना राज्य व्यवस्था तथा सुशासन समितिके २०७८ वैशाख २ गतेके निर्णय बमोजिम नेपाल प्रहरी प्रधान कार्यालय अपराध अनुसन्धान विभागके पहलमे पहिचान नइखुलल शव तथा हेराइल व्यक्तिके विवरण समेटके सक्कु विवरण एक्के ठाउँसे जानकारी लेहे सेक्ना ओ कोई व्यक्तिके पहिचान करलेसे अपन जानकारी ओ विवरण रिपोर्ट करे सेक्ना करके निर्माण करल वेवसाइट अँटवारसे प्रयोगमे आइल उ अवसरमे जानकारी डेहल बा ।

कार्यक्रममे प्रहरी अतिरिक्त महानिरीक्षकहुक्रे, प्रहरी नायव महानिरीक्षकहुक्रे, वरिष्ठ प्रहरी अधिकृतहुक्रे ओ योङवमाइन्ड्स क्रियसन प्रालिके प्रतिनिधिह्कनके उपस्थिति रहल रहे ।