योजना अलपत्र बनैना निर्माण कम्पनीके म्याद नइठप्ना निर्देशन

पहुरा समाचारदाता
धनगढी, १७ भदौ । सुदूरपश्चिम प्रदेशके भौतिक पूर्वाधार विकासमन्त्री प्रकाशबहादुर देउवा नम्मा समयसम योजना अलपत्र परुइया निर्माण कम्पनीके म्याद नइठप्ना निर्देशन डेले बटै ।
नेपाल प्रेस युनियन डडेल्धुरा शाखासे आयोजना करल एक कार्यक्रममे बोल्टी निर्माण व्यवसायीके कारण समस्या आइल कहटी मन्त्री देउवा यी निवेदन डेहल भरमे म्याद थप नइकैना मातहतके कार्यालयहे निर्देशन डेहल बटैले बटै ।
मन्त्री देउवा जनताके प्रत्यक्ष सरोकार रख्ना योजनामे मजा बजेट अइना मने कार्यान्वयनमे समस्या हुइना करल बटैलै । ‘प्रदेश सरकारसे सदा मजा बजेट आइठ,’ उहाँ कहलै, ‘मने सदा बजेट फ्रिज जैना समस्या बा । यम्ने कार्यान्वयन कैना कार्यालय ओ निर्माण व्यवसायी सबसे ढेर दोषी बटै ।’
प्रदेशके भौतिक पूर्वाधार विकास मन्त्रालय मातहतके कार्यालय प्रमुखहे समयमे योजना कार्यान्वयन कैना मन्त्री देउवा निर्देशन डेले बटै । खानेपानी तथा सरसफाई डिभिजन, यातायात व्यवस्था कार्यालय ओ पूर्वाधार विकास कार्यालयके गतिविधिबारे जानकारी लेटी मन्त्री देउवा चालू आर्थिक वर्षके योजना समयमे कार्यान्वयन कैना निर्देशन डेहल हुइल ।
प्रदेश सरकारसे बजेट कार्यान्वयनके शैली बडल्टी रहल बा, मन्त्री देउवा कहलै, ‘असारमे बजेट अइना ओ फागुनमे ठेक्कामे जैना परीपाटीके अन्त्य कैना हम्रे सक्रिया बटी । योजना छनोट ओ बजेट ल्यन्ना प्रक्रियासे हम्रे पूरान शैली परिवर्तन करल रही । अब्बे बजेट कार्यान्वयनफे फरक शैलीमे करटी ।’ विगतमे योजना कार्यान्वयनमे ढिलाई हुइना समस्या रहल बटैटी उहाँ समयमे योजना कार्यान्वयनके लाग प्रदेश सरकार ओ मातहतके कार्यालय लागि परल उहाँ बटैलै ।
‘अब्बेक सरकारसे कौनोफे योजना झ्यालसे नइनानल हो,’ उहाँ कहलै, ‘सक्कु तरेक तहसे आइल योजना प्रदेश सरकारके बजेटमे अटाइल बा । अब उ योजना समयमे कार्यान्यन हुई ।’ मन्त्री देउवा अब्बेक प्रदेश सरकार जनतासे महशुस कैना मेरिक काम करटी रहलफे दाबी करलै ।
