त्रिनगर भन्सारमे प्लान्ट क्वारेन्टिन सुचारु कैना माग

पहुरा समाचारदाता
धनगढी, १७ भदौ । कैलालीके त्रिनगर भन्सार कार्यालयमे प्लान्ट क्वारेन्टिन सुचारु कैना कैलाली उद्योग वाणिज्य संघ माग करले बा । संघसे अँट्वारके पत्रकार सम्मेलन मार्फत प्लान्ट क्वारेन्टाइनके टुरमुकाम सञ्चालन ओ स्थायी कार्यालय स्थापनाके माग करल हो । उक्त क्वारेन्टिन कार्यालयके टुरमुकाम कार्यालय बन्द हुइलपाछे खाद्यान्न, तरकारी ओ फलफूल आयात ठप्प हुइल कारण संघसे सुचारु कैना माग करल हो ।

क्वारेन्टिन कार्यालयके टुरमुकाम कार्यालय एकठो किल कर्मचारीसे सञ्चालन करटी रहल अवस्थामे उ कर्मचारी तालिमके लाग बिदा लेके गैलपाछे कार्यालय बन्द होके खाद्यान्न, फलफूल ओ तरकारीके गुणस्तर परीक्षण हुइसेकल नैहो । जेकर कारण तीन अँठ्वारसे आयात ठप्प हुइल कैलाली उद्योग वाणिज्य संघ जनैले बा । उ प्लान्ट क्वारेन्टिन एकाएक बन्द होके कृषिजन्य वस्तु निकासी पैठारी कैना उद्योगी व्यवसायी असहजता भोग्टी रहल संघके अध्यक्ष पुष्पराज कुँवर बटैलै । उहाँ कृषिजन्य वस्तुके निकासी पैठारी रुकके सरकारसे प्राप्त कैना राजस्वमे समेत असर परल बटैलै ।

इहे बिच संघसे शनिच्चरके कैलालीके प्रमुख जिल्ला अधिकारीमार्फत प्रधानमन्त्रीहे ज्ञापन पत्र फेन बुझैले बा । अर्थ मन्त्रालय, कृषि, भूमि व्यवस्था तथा सहकारी मन्त्रालय, भन्सार विभाग ओ प्लान्ट क्वारेन्टिन तथा विषादी व्यवस्थापन केन्द्रहे बोधार्थसहित प्रधानमन्त्रीहे बुझाइल ज्ञापनपत्रमे त्रिनगर भन्सार कार्यालयस्थित प्लान्ट क्वारेन्टिन टुरमुकाम कार्यालयहे तत्काल पूर्ववत् रुपमे सञ्चालन कैना माग करल बा ।

प्लान्ट क्वारेन्टिनके टुरमुकाम कार्यालयसे खाद्यान्न, तरकारी ओ फलफूलमे रहल विषादी, कीटजन्य संक्रमण परीक्षण कैके मापदण्ड पुगल रलेसे आयात कैना सिफारिस डेना करल रहे । उहे अनुमतिके आधारमे भन्सार कार्यालयसे भन्सार जाँचपास कैके राजस्व लेके आयात अनुमति डेना करल बा ।

मने, उक्त कार्यालय बन्द हुइलपाछे भन्सारसे तरकारी, खाद्यान्न ओ फलफूल आयात रोकल बा । गड्डा चौकीसे आयात करेबर भारतसे बनबासा पुलके सीमित भारवहन क्षमताके कारण मालवाहक ट्रक लाने नैडेना ओ नेपालगन्ज नाकासे लानेबर ढुवानी मूल्य बह्रना हुइल ओरसे खाद्यान्न, तरकारी ओ फलफूल आयातमे असहज हुइल जनाइल बा ।

प्रदेशके उत्पादन खपत होके अपुग हुइल १ लाख टन तरकारी, खाद्यान्न ओ फलफूल भारतसे आयात हुइना करल बा । आपूर्तिके आधा परिणाम खाद्यान्न, तरकारी ओ फलफूल त्रिनगर नाकासे किल आयात हुइना करल बा । भन्सारके तथ्यांक अनुसार गत आर्थिक बरस २०७९–८० मे ५५ हजार ९४५ टन खाद्यान्न, तरकारी ओ फलफूल त्रिनगर भन्सार नाकासे भित्रल रहे ।