धानबाली जोगाइक लाग छोरल करेन्ट लागके एक जानेक मृत्यु
पहुरा समाचारदाता
धनगढी, १९ भदौ । जंगली जनावरसे धानबाली बचाइक लाग खेतुवामे प्रयोग करल विद्युतीय धरापमे परके एक महिलाके मृत्यु हुइल बा । धनगढी उपमहानगरपालिका–३ होल्डिङ सेन्टर लग्गे बैठना वर्ष अन्दाजी ३१÷३२ की मञ्जु कुँवरके सोम्मार रात विद्युतीय धरापमे परके मृत्यु हुइल हो ।
जंगली जनावरसे धानबाली बचाइक लाग खेतुवक मेरुवामे छोरल करेन्टमे परके रात करिब ११ बजेओर मञ्जुके मृत्यु हुइल प्रहरी जनैले बा ।
जिल्ला प्रहरी कार्यालय कैलालीके निमित्त प्रवक्ता प्रहरी निरीक्षक सन्तोष बस्याल करेन्ट लागके घाहिल हुइल कुँवरके उपचारके क्रममे रात ११ बजके ५५ मिनेटमे मायामेट्रो अस्पतालमे मृत्यु हुइल बटैलै ।
प्रहरीसे रातके उहे ठाउँ बैठना वर्ष ४८ के जंगलिया चौधरीहे सोधपुछके लाग नियन्त्रणमे लेले बा । ओस्टेक घटनास्थलमे भारतसे भन्सार चोरी निकासी करके ल्यानल कुछ सामान भेटल बा । घटनाके अनुसन्धान हुइटी रहल जिल्ला प्रहरी कार्यालय कैलाली जनैले बा ।
