जीतबहादुर चौधरी प्रदेशके उत्कृष्ट हेड मास्टर, राष्ट्रपतिसे सम्मानित
पहुरा समाचारदाता
धनगढी, २१ भदौं । जीतबहादुर चौधरी ‘ट्रासन’ सुदूरपश्चिम प्रदेशके उत्कृष्ट प्रधानाध्यापकके रुपमे राष्ट्रपति रामचन्द्र पौडेलसे सम्मानित हुइल बाटै ।
नेपालके शिक्षा तथा पर्यटन क्षेत्रमे योगदान पुगुइया टमान व्यक्तित्वहुक्रनहे इ बरसके राष्ट्रिय शिक्षक पुरस्कार तथा टुरिजम लाइफटाइम अवार्ड प्रदान करल हो ।
देशभरसे छनोट करल व्यक्तित्वहुक्रनहे राष्ट्रपति रामचन्द्र पौडेल मंगरके उक्त अवार्डसे सम्मानित करल हुइट । राष्ट्रपतिके कार्यालयमे आयोजित अवार्ड वितरण कार्यक्रममे इ बरसके ‘पीपी प्रसाईं लाइफटाइम अचिभमेन्ट अवार्ड २०८०’ पर्वतारोही आङ छिरिङ शेर्पाहे प्रदान करल बा ।
प्रतिष्ठानसे हरेक बरस सामुदायिक विद्यालयमे क्रियाशिल शिक्षकहे प्रोत्साहन कैना उद्देश्यसे शिक्षा क्षेत्रमे विशिष्ट योगदान पुगुइया सात प्रदेशके उत्कृष्ट शिक्षकहे पुरस्कारसहित ५० हजार नगद ओ १० हजारबराबरके शैक्षिक सामग्री प्रदान कैटी आइल बा ।
