जीवन बिमा सम्बन्धी अभिमुखिकरण
पहुरा समाचारदाता
हसुलिया, २५ भदौं । जीवन विमा सम्बन्धी स्थानीय सरोकारवालासंग एक दिने अभिमुखिकरण कार्यक्रम कैगिल बा । सन नेपाल लाईफ इन्स्योरेन्स कम्पनी लिमिटेड सुदुरपश्चिम प्रदेशके आयोजनामे कार्यक्रम कैगिल हो ।
कैलारी गाउँपालिकाका अध्यक्ष राजसमझ चौधरीके वडका पहुनामे हुइल कार्यक्रममे गाउँपालिका उपाध्यक्ष भगवतीकुमारी चौधरी विशिष्ट पहुना रहल रहिट ।
सन नेपाल लाइफ ईन्स्योरेन्सके केन्द्रीय कार्यालयमे कार्यरत कर्मचारी रचना घिमिरे ओ सुदूरपश्चिम शाखाके प्रमुख लक्ष्मीकान्त जैशी सहजीकरण करल रहिट । अभिमुखिकरणमे सहभागीहुकनहे जीवन बिमाके संक्षिप्त परिचय, प्रकार ओ आवश्यकताके बारेमे प्रकाश पारल रहे । उ कार्यक्रममे संस्थासे सामाजिक सुरक्षा कार्यक्रम अन्तरगत दिपेन्द्र माध्यमिक विद्यालयके गरिव तथा जेहेन्दार विद्यार्थीनहे शैक्षिक सामाग्री वितरण कैना उदेश्यसे २५ हजार रुप्या बराबरके चेक विद्यालयके प्रधानाध्यापक विनोद भट्टराईहे हस्तान्तरण करले बा ।
सन नेपाल लाइफ इन्स्योरेन्स धनगढी शाखाके प्रमुख योगेन्द्र विक्रम अधिकारीके सभापतित्वमे हुइल कार्यक्रममे कैलारी गाउँपालिकाके ९ वडाके वडा अध्यक्ष, कार्यपालिका सदस्य, वडा सदस्यहुकनके सहभागिता रहे । कार्यक्रममे नेपाल लाईफ इन्स्योरेन्स सुखड शाखाके प्रमुख शाहदेव चौधरी स्वागत मन्तब्य व्यक्त करल रहिट ।
