डीसीएसे तीन राष्ट्रिय क्रिकेटर गृहनगरमे सम्मानित
पहुरा समाचारदाता
धनगढी, ४ कुवाँर । महिला टी–ट्वान्टी विश्वकपके एसिया छनौटमे नेपालहे सेमिफाइनलसम पुगैना महत्वपूर्ण योगदान डेहल तीन महिला क्रिकेटरहे गृहनगर धनगढी क्रिकेट एकेडेमी(डीसीए)से सम्मानित करले बा ।
नेपाली टोलीमे रहल धनगढीके कविता कुँवर, इश्वरी विष्ट ओ रुवि पौदारहे डीसीएसे बिफेक रोज सम्मान करल हो । सम्मान कार्यक्रमके प्रमुख अतिथि तथा ग्रेस इन्टरनेसनलके निर्देशक अन्ड्रु पौडेल तीनु जनहनहे सम्मानपत्र ओ मायाके चिनोसहित सम्मान करलै ।
सम्मानग्रहण करलपाछे कवितासे ग्रासरुट क्रिकेटके विकासमे डीसिएके महत्वपूर्ण योगदान रहद ओ नम्मा समयसे यहाँके क्रिकेट विकासमे भूमिका खेलल संस्थासे सम्मानित हुई पाके खुशी लागल बटैली । सम्मान करटी अन्ड्रुसे राष्ट्रिय खेलाडी देशके गहना रहल ओ सम्मानके अवसर डेहेलमे डीसिएहे धन्यवाद ज्ञापन करलै ।
गत हप्ता हुइल प्रतियोगितामे थाईल्यान्डसंग सेमिफाइनलमे पराजित हुइटी नेपाल प्रतियोगितासे बाहिरल रहे । डीसीएसे अन्तर्राष्ट्रिय खेलाडीहे शतप्रतिशत निशुल्क प्रशिक्षणके व्यवस्था मिलैटी आइल बा । साथे सक्कु महिला खेलाडी निशुल्क प्रशिक्षणके व्यवस्था बा । डीसीएमे आधा दर्जन ढेर अन्तर्राष्ट्रिय खेलाडी प्रशिक्षणरत् बटै ।
लगत्ते डीसिएसे महिला खेलाडीके विकासके लाग प्रिसेस कप क्रिकेटके फे आयोजना करटी बा । सम्मान कार्यक्रममे डीसिएका प्रशिक्षक राजु रिजाल, प्रबन्धक समुयल न्यौपान लगायतके उपस्थिति रहे ।
